Power megawatt 3600+ thar thei Mizoram-in Mw 40 a thar tling lo – Power minister

Mizoram-in kawlphetha megawatt 3600 chuang thar theihna khawp a neih laiin, tunah Mw 40 pawh a thar tling loa, sawrkar tharin intodelh turin hma a la mek tih Power minister F Rodingliana chuan a sawi.
Zirtawpni khan Power & Electricity department chuan an minister hoin hnathawh thlirlet pahin sawrkarin Power Policy a duan chu inhrilhfiah a ni a, SDO chin chunglam zawng an tel.
Minister chuan Cyclone Remal-in khaw 100 dawnah nasa taka a powerline a tihchhiat chu nihnih chhung lekin zaa 80 chuang siamthat hman a ni tiin, thawktute inpekna leh thawhrimna vangin lawmthu a sawi. Power-a intodelh tura sawrkar thar Power Policy leh hmachhawp thenkhat sawiin, hydel project bikah Mizoramin Mw 3600 chuang thar chhuak thei a nih laiin, tunah Mw 40 pawh tlinglo a thar chu a veiawm a. Sawrkarin power-a intodelh tura hma a lakna chu thawktute pawhin theihtawp chhuah turin a sawm tih a sawi a ni.
Kum 3/4 lek chhungin power mamawh megawatt 40 dawna a san thut avangin an hmanrua ten a dawl zo tawh meuh lo a, hei hian power pek kawngah harsatna a siam nasa a, power mamawhna sang thut dawl zo tur hian hmunhma leh bungrua ti changtlung turin state sawrkar sum bakah central lamah nen hma lak a ni tih a sawi bawk.
Nizung chakna (solar power) hmanga power siam kawngah pawh hma lak niin, tunah hian Thenzawlah Mw 10 thar thei thawh mek a nih bakah Mizoram hmun hrang hrangah Solar Power Plant bun turin private entrepreneur-te nen tanghoa hma lak a ni tih a sawi.
Thawktu indaihlohna a nasa a, thawktute thawhrim zia a hriatpui tih minister hian a sawi a. Sawrkar sum dinhmun avangin hna thar lak zung zung a harsa a, hei vang hian a tam thei ang ber privatisation leh outsourcing kalpui tum a ni, tiin, department thawktute pawh helam hawia ngaihtuahna seng turin a chah a ni.
Thutkhawmah hian SDO chin chunglam telin, chief engineer-ten report an pe a; Power Circle hrang hrangin harsatna an neih an report a, hmalak dan tur sawi ho a ni.