‘Praise On’ Top 30 intihsiak zo ta

‘Praise On’ Top 30 intihsiak zo ta
SYNFO leh Central K|P buatsaih mal zai intihsiakna, ‘Praise On’ pawh a hmawr an bâwk hnai ta a, nizan khan Top 30 intihsiak zan hnihna zoin, he thu i chhiar hi chuan Top 10-a tling te i hre hman tawh ngei ang.
Ningani zan (Oct 24, 2024) zan khan Praise On 2024 Top 30 intihsiak zan khatna chu Saron Veng Presbyterian Kohhran hall-ah neih a ni a. Nizan khan Top 30 intihsiakna, zan hnihna chu neih leh niin, Top 30 atang hian Top 10 thlan chhuah leh tur niin, nizan khan Top 10-a tlingte hming hi puan chhuah nghal tura ruahman a ni.
Top 10 te hi November 7 leh 8 chhunga neih leh tur a ni a. Top 10 intihsiakna hi Dawrpui Presbyterian Kohhran Hall-ah neih a ni ve thung ang a. Live Music-a zai rem a ni tawh dawn a, zan khatnaah Mizo Lengkhawm hlain an intihsiak ang a, zan hnihnaah mahni hla duh zawng an sa ang. Zan hnihnaah hian intihsiak zawhah Top 5 result puan a ni ang.
Kumin Praise On-ah hian K|P branch za chuang atangin tel tura hming pe, mi 360 vel an awm a. Audition-a inlan thei chu mi 314 an ni.
September 6, 2024 atang khan audition bul tan a ni a. Aizawl pawnah Champhai, New Serchhip, Kolasib leh Lungleiah te audition hi neih a ni a, Aizawl Audition chu Tuikual Presbyterian Kohhranin an thleng a. Audition-a mi 314 atangin First Round intihsiakna hmachhawn zui zel tur mi 117 an tling a. October 14-16 chhung khan Saron Veng Presbyterian Kohhran Hall-ah mi 117 te hi an intihsiak a, Top 30 thlan chhuah an ni leh ta a ni.