Premier League award sem turah Haaland langsar

Premier League award sem turah Haaland langsar
Season kal lai Premier League-a goal khung hnem ber ni mek Manchester City striker Erling Haaland chu a zawna a vawihnihna atan Premier League player of the season ni thei dinhmunah dingin, he award dawng thei tura thlanchhuah (nominee) zinga a tel bakah nikuma a dawn tho Premier League young player of the season shortlist zingah a tel zui leh chiah bawk.
Kum 23-a upa Norway international hian Premier League player of the season ni thei turin a City team-mate Phil Foden bakah Arsenal midfielder pahnih Martin Odegaard leh Declan Rice, Chelsea forward Cole Palmer, Newcastle striker Alexander Isak, Aston Villa forward Ollie Watkins leh Liverpool defender Virgil van Dijk-te a hmakhalh a ngai dawn a ni.
He’ng shortlist tarchhuah mi pariat atang hian mipui leh Premier League panel lamin vote hmangin an duh ber an thlangchhuak dawn a, award dawngtu chu May ni 18 khian puanzar a ni ang.
Nikum khan Haaland hian league game 35 khelin goal 36 a khung tling a, player of the season award leh young player award dawngkawp thei hmasaber a ni.
Tun season kal laiah hian league game 35 a khelh tawh atangin goal 25 a khawl tling leh tawh a, nikum a pha lo hle chungin a team vawn lai chu a zawna title vawili la tling thei turin beiseina a neihpui mek a ni.
Kum 2006-07 leh 2007-08 award dawngtu Manchester United striker hlui Cristiano Ronaldo chiah kha a zawna Premier League player of the season award dawng thei awmchhun tun thlengin a la ni a, Haaland hian nihrualpui thei tak ang maw?
Tunhnai mai khan England forward Foden chu Football Writers’ Association lamin footballer of the year atan an thlang a; chu chawimawina dawng thei tur chuan season kal laiah league goal 16 thun tling tawhin, assist vawikua a nei bawk a, Haaland lakah chuan la nau tak a ni!
Tunhnai season liamta hnuhnung paliah khan he award hi City player hlirin an la dawng a, Haaland-a hlawhtlinna kan hmuh hma khan Kevin de Bruyne (2019-20 & 2021-22) leh Ruben Dias (2020-21)-te chan a ni.
Kumina nominee dang pahnih Odegaard leh Rice hi kum 20 chhunga Arsenal title hmasaber ni thei tur beiseina kal vung mek chhemalhtu pawimawh niin, Norway international Odegaard hian league goal riat bakah assist vawiriat bawk nei tawhin, England player Rice hian West Ham atanga North London club a zawm hnua a season khatna a hman mekah goal kua leh assist vawisarih a nei tling ve tawh bawk.
Nikum September thlaa City chhuahsana Chelsea lama insawn ta Palmer hian a club thar tan thawhhlawk bawkin, goal 21 bakah assist vawikua a nei tling tawh a; nominee dang Sweden international Isak hian goal 20 bakah assist vawikhat a nei tling.
England player dang Watkins pawhin Villa tan season ropui hmang mekin, goal 19 leh assist tum 12 a ngah tawh a; kum 2018-19 lama he award lo hui ve tawh Netherlands international Van Dijk erawh goal venhim lam buaipuitu niin, goal thun lamah chhuan tur a ni lo a, mahse, season kal laiah hian Liverpool chu Carabao Cup a lakpui fel leh der tawh a ni.
Tarlan tak angin, Haaland, Foden, Palmer leh Isak-te hi Premier League young player of the season shortlist zingah Arsenal forward Bukayo Saka leh defender William Saliba, Manchester United midfielder Kobbie Mainoo leh Tottenham defender Destiny Udogie-te nen an awmho.
Premier League player of the season shortlist tarchhuah taka lang lo langsar zinga Manchester City midfielder Rodri a tel a, Etihad club hlawhtlinna kal meka an player pawimawh ni chunga a hming lang ve ta lo hian mak tih pawh a hlawh viau reng a ni.
Nikum February thla daih tawha Tottenham khelmuala an tlawm hnu khan Spain international Rodri tel tawhna game-ah tun thlengin City hi an la tlawm leh ta lo a, Rodri hoa an an tlawm loh zawn belhkhawm hi game 47 zet a tling tawh!
Newcastle winger Anthony Gordon pawh hi lang pha lo langsar zingah telin, season kal laiah top flight game 33 atangin hoal 10 leh assist vawi 10 a nei tling tawh a; club lama a chetthat em avangin England squad-ah pawh telh a ni hial a ni.
England striker Dominic Solanke pawhin Bournemouth tan goal 18 leh assist vawithum nei tawhin, Liverpool forward Mohamed Salah pawh hian 2023-24 campaign kal laiah goal 18 leh assist vawi 10 ngawt nei tawh mah se an pahnih hian shortlist-ah an lang pha lo.
Vawili ngawt manager of the season award dawng tawh Manchester City boss Pep Guardiola chu tuntum hian nominee zingah tel lehin, Arsenal manager Mikel Arteta, Liverpool head coach Jurgen Klopp, Villa boss Unai Emery leh Bournemouth kaihruaitu Andoni Iraola-te nen nominee an niho.