President-in mi 71 hnenah Padma Award hlan

President-in mi 71 hnenah Padma Award hlan
President Droupadi Murmu chuan Thawhtanni khan chawimawina ngaihhlut hlawh, Padma Award chu kawng hrang hranga thawk tha mi 71 hnenah a hlan.
Civil Investiture Ceremony hi hi Rashtrapati Bhawan-a Durbar Hall-ah neih niin Padma Vibhushan pali, Padma Bhushan 10 leh Padma Shri award 57 sem chhuah a ni.
Tun tuma Padma Award hlan hi kumina a vawi khatna a ni.
Violinist hriat hlawh, L. Subramaniam chu art lama a thawh hlawk avangin Padma Vibhushan hlan a ni a. Suzuki Motor Corporation CEO thi tawh, Osamu Suzuki chu sumdawnna leh industry-a a thawh hlawk avangin Padma Vibhushan hlan a ni a. A fapa, tuna CEO ni mek, Toshihiro Suzuki chuan a aiawhin a dawng.
Art-ah film siamtu Shekhar Kapur, lemchang thiam leh Andhra Pradesh MLA Nandamuri Balakrishna, lemchang thiam S. Ajith Kumar, leh zaithiam thi ta, Pankaj Udhas te chu Padma Bhushan hlan an ni a. Udhas-a aiawh hian a nupui, Farida Udhas-in a dawng a. Indian hockey goalkeeper thin, P.R. Sreejesh hnenah sports lama a thawh hlawk avangin Padma Bhushan hlan a ni bawk.
Padma Shri dawngtu zingah hian rimawi lama thawh hlawk vangin playback singer Jaspinder Narula leh sports-a hming tha Indian cricketer Ravichandran Ashwin te an tel.
Vedic scholar hriat hlawh, Ganeshwar Shastri Dravid hnenah pawh Padma Shri hlan a ni a. Ani hi Ayodhya-a Ram Janmabhoomi temple-a Ram Lalla-a awm hun chhung chhut chhuaktua ngaih niin Varanasi-a Kashi Vishwanath Corridor dintu zinga mi a ni bawk.
American thu ziak mi leh thil zir bing mi, Vedic culture leh thlarau lam nun ziaktu, Stephen Knapp-a chu thu leh hla leh zirna lama a thawh hlawk avangin Padma Shri hlan a ni.
India-a civil mite chawimawina sang ber, Padma Award-te hi kum tin kawng hrang hrang – art, vantlang thil, science & engineering, damdawi, vantlang tana thawk tha, thu leh hla leh zirnaa thawh hlawkte hnenah hlan thin a ni.