PRESS MITE TIHMUALPHO KHA

M. Lalmanzuala

Kumin Republic Day lawmna pui ber Lammuala Press mite tana thutna siamsak a ni lo chuan sawi a hlawh hle a. Hriatthiam a har êm a ni.
Press mite hi tual chhung leh khawvel ram hrang hranga thil thleng pawimawh a rang thei ang bera min hriattir thintute an ni a. Khuarel thil thleng thlipui na tak lo tleh tur thu min hrilh te chuan invên lâwk theihna lama hma kan lo lâk vat theihna te a ni a, a tangkaiin a pawimawh a. Indo lai leh lirnghing hlauhawm laka kan him theih nana a hun taka kalna/awmna tur min hrilh thintute an ni.
Democracy kan neih atang phei chuan mipui aiawha kan rawngbawl tura kan thlan sawrkar hruaitute chuan an thiltih apiangah Press mite chu an mit an beng, an kut an kê an ni a. An pawimawhzia, an tel lova awm theih a nih lohzia lanchianna ber chu, ‘Fourth Estate’, ‘Fourth Pillar’ tih hiala hriat an ni thin hi a ni. Protestant Reformation a darhzau thuai theihna chhan ber kha Printing Press vang a ni tih te pawh kan hre thin a ni.
Hun pawimawh apianga Press mite tana hmun bîk siamsak an nih thin hi tih dan dik leh tangkai a ni a. Thil thleng pawimawh tawh phawt chu a hmun ngeia mita hmu-a benga hria-ina a ‘report’ a tul a. Chu tiang tih nan chuan thil thlenna hmun, thusawina hmun hnai tâwka Press mite an awm a ngai a ni. Hei hi thudik awm sa, sawi vak pawh ngai lo khawpa chiang a ni.
Tun tuma thuneituten thutna tha chu sawi loh, thutna tak ngial pawh an lo siamsak lo hi a mak a, hriatthiam a har a ni. Tun hnu-a he tiang thil hi a thlen leh ngai tawh loh nan thuneitute chuan awmze nei taka ‘action’ an lâk a ngai a ni. Preliminary enquiry la se, a mawhphurtu apiang chu pakhat a ni emaw, a aia tam an ni emaw, ‘suspend’ se, chu chu ‘formal enquiry’-in zui se, mawhphurtu apiang chu hremna na tâwk pek a tha ang. Chu tiang tih a nih loh chuan tun hnu-ah he tiang thil hi a thleng lo vang tih rin theih a ni lo vang.
Chief Secretary ka nih hlim khan sawrkar hnathawk a hun taka office kal kha an awm ngai mang lo va. Kei hi eng lai maha office leh meeting te pawha kal tlai ngai lo ka nih avangin rang tak leh huai takin ‘action’ ka la nghal a. ‘Surprise checking’ kan nei nghal a. Kal tlai apiang ‘casual leave’ ni khat kan cut-sak a. Kal tlai nawn chu ‘earned leave’ kan cut-sak leh a. Hremna vawi thum pek ngai chu an awm ta lo va, ka hun chhung kha chuan office kal tlai an awm kan hre ngai ta lo a ni.
Chu tiang bawk chuan Treasury Rules-in a phût angin Cashier-tinte kha chawhnu dar 4 velah an pawisa hman ban apiang treasury-ah kan dah luhtir ziah a. Chief Minister tan pawha pawisa fai cheng khat pawh eiruk theih lohin pawisa leng vel tur kha kan dang char a ni.
Diklohna chu a ngampat lohva, Diknain ro a rêl nan, thil tidiklotu chuan a phû tawk hremna a hmu ngei tur a ni kan ti a ni e.
Thil tidiklotu hrem a nih loh chuan thuneituten chu tiang ti tura Huaisenna an nei lo tihna a ni ang a. Kan kal zelna tura ngaihthatlohna min neihtirtu a ni ang a. Ram leh hnam tana thil pawi tak a ni ang.