Primary school kalpui dan en

Primary school kalpui dan en
AMC Ward No.14 corporator Ramthanzauvi chuan Ningani khan a ward chhung Khatla South-a Govt. Primary School a tlawh a, zirna kalpui dan, zirtirtu dinhmun bakah school building enin hmasawnna awm theih dan tur an sawiho.
Corporator chuan a bial chhunga zirna in, a bikin sawrkar zirna in chu a vei em em a, tlawhchhuaha an dinhmun en leh mamawh ngaihthlak a duh tih a sawi. English medium school a tam tawh avang leh mi nawlpui luhna a nih tawh avangin sawrkar school-te an tang a, Khatla South Govt. Primary School pawh chhuanawm leh tan la ber zing ami an ni tih a sawi a ni.
Headmistress Lalnuntluangi Ralte sawi danin, zirlai 44 (mipa 17 leh hmeichhia 27) an nei a, zirtirtu 7-in an enkawl. Lehkha zirtir piahlamah enkawl ngai lehzual naupang an nih avangin nitin school an rawn kalnaa an lo enkawl danah tute fiah pawh an ngam tih a sawi.
AMC Ward 14 corporator Ramthanzauvi hian Khatla South MUP hruaitute a kawm bawk a. An building tur sak bul tan mek puihna atan Rs.50,000/- a hlan bawk a ni.