Primary zirtirtu 2652 tablet pe dawn

Mizoram Samagra Shiksha hnuaiah primary zirtirtu 2652 hnenah zirtirna atana hman tangkai tur tablet pek an ni dawn.
Mizoram Samagra Shiksha hnathawhna atana Project Approval Board (PAB) in a pawm chin tarlanna minute chu tihchhuah a ni a. Kum 2023- 2024 chhunga sum hmuh tur chu vaibelchhe 560.72 niin, kum hmasa aia a punna chu zaa 49.2 a ni.
Mizoram zirna tarlanah mihring chenna khaw awm zat atanga zirna school hawn, Gross Access Ratio (GAR) a pung a, GAR hi elementary-ah zaa 97.29, upper primary school-ah zaa 95.2, secondary school-ah zaa 81.96 leh higher secondary school-ah zaa 47.87 a ni. Naupang zawng zawngin school an kal theihna’n school hawn belh zel tum a ni.
CSS Hindi zirtirtute hlawh tur hmuh a ni a. Primary zirtirtu 2652 hnenah zirtirna atana hman tangkai tur tablet pek an ni dawn.
School tha lo sak thatna tur leh repair-na tur hmuh a ni a. Hun rei tak chawlhsan tawh Pipe Band Academy chu district 10-ah pek thar an ni dawn.
Hnahthial leh Khawzawl district-ah DIET hawn thar a ni dawn a, Aizawl DIET building sakthatna tur leh SCERT building sakna turte hmuh a ni.
Zirlaiten science zirnaah hriatthiamna thuk zawk an neih theihna’n higher secondary school science stream tan bilingual textbook (English leh Mizo-a ziah) siam a ni dawn a, MBSE zirlaibu class I – XII te chu Braille textbook large print a siam a ni dawn bawk.
Ziak leh chhiar bulthut zirtirna NIPUN Bharat atan class I – V zirtirna tur hmuh a ni a. RTE Act amend zulzuiin class 3, 5, 8 te thiamna tehchhuahna tur neih theih beisei a ni a; elementary leh secondary tan state level-a assessment neihna tur sum hmuh a ni.
Pre primary school 49 hawn belh a ni dawn a, BRC thuamthatna tur hmuh a ni. Aspirational district Mamita school 10 tan Tinkering Lab hmuh a ni bawk.
Kum 2022-23 chhunga 2nd instalment dawn loh avanga la thawh hman lohte thawhna tur sum hmuh a ni.
# Primary leh upper primary school inkawp pahnih, secondary school pathum hawn belh a ni dawn a. Higher secondary school-ah science, arts leh commerce la awm lohna school 14 ah hawn belh a ni dawn a, science zir theihna 7, arts zirna 6 leh commerce zirna 1 a ni.
# Science leh arts stream inkawp school pakhat hawn thar a ni anga, science leh commerce inkawp hmun hnihah hawn a ni bawk ang.
# HSS neih tawh sa school pakhatah science zirna pek belh a ni anga, school dang pakhatah commerce zirna pek belh a ni ang.
# ICT facility chu elementary school 157 leh secondary school 60 ah pek an ni dawn.
# Girls hostel pathum leh KGBV building sakthatna tur hmuh a ni a, residential quarters 10 sakna tur hmuh a ni.
# Vocational education (VE) chu secondary school 46 ah hawn belh a ni dawn a; school 7-ah job role pahnih theuh pek an ni anga, school 39 ah job role pakhat theuh pek belh an ni ang. VE pek tawhna school hi a pumpui atanga chhutin zaa 25.5 atangin zaa 39 ah a kai dawn.
# Grassroots Sports Development Centre 40 neih mek chu belhchhahin Centre 6 dang siamna tur hmuh a ni. Tunah hian zirlaite tan football, hockey, badminton, weightlifting leh boxing zirna hawn a ni tawh a, centre dang 6 hawn thar turah hian Table tennis, taekwondo leh basketball zirna hawn leh a ni ang.