Private damdawi in pan chak
chhan pakhat ‘nursing care’
– Lalrinpuii
Damloten sawrkar damdawi in aia private hospital pan an chak chhan pakhat chu nursing care a ni thin tih Health minister Lalrinpuii chuan a sawi a. Hei hi sawrkar damdawi inah an kalpui ve thei tih a sawi.
Health & Family Welfare minister hian Inrinni khan Mamit a tlawh a. District Hospital, CMO Office, NHM, District Child Protection office leh Home hrang hrang a tlawh.
Sawrkar damdawi in tichaka tichangtlung turin nasa takin hma lak mek zel a ni tih a sawi a. Mamit District Hospital mamawh leh hmasawnna atana hmachhawp pawh ngaihtuah zel a ni dawn tih a sawi.
Sawrkar damdawi ina thawktute chu indaihlohna chhuanlama hmang loa, taima leh rinawm taka hna thawk turin a chah a. Damloten sawrkar damdawi in aia private hospital pan an chak chhan chu nursing care a ni thin, tiin, “Hei hi a pawiin a veiawm em em a; sawrkar damdawi inah hian kan kalpui ve thei a ni,” a ti.
Doctor zaidam leh fel tak chu a tawngkam ringawt pawh damlote tana damna thlentu a ni thei a ni tih hrereng turin Health minister hian a chah a. District Hospital khum 100 awm theihna sak zawh tawh, a sak dana duhthusam loh lai enin, eng luhna tura siamthat ngai thawktute nen an en a ni.
District medical superintendent Dr Lalrinfela H sawi danin, tunah thawktu 108 an awm a, tun aia service tha tura mamawh belh zingah operation kalpui tura nurse leh 4th grade indaihlohna, ambulance tha tawk tawh lo leh a driver indaihlohna avanga harsatna awm thinte thlen a ni.
Social Welfare minister ni bawk Lalrinpuii hian Mamita home hrang hrang, One Stop Centre leh District Programme office a tlawh a, thawktute nen an inkawm a ni.
Private damdawi in pan chak chhan pakhat ‘nursing care’ – Lalrinpuii
Get real time updates directly on you device, subscribe now.