Private damdawi in-ten cashless duh lo Sawrkarin cashless hman ngei tum rih

Sawrkar damdawi in ni lo zawng, kohhran leh mimal damdawi in ho chuan Mizoram sawrkarin health care scheme thar a duan chu an ring ngam loa, re-imbursement system hmang zui turin sawrkar an ngen. Hetihlai hian sawrkar chuan cashless system hman chu an lo ruahman dan a ni tawh tih an sawi thung. Mizoram Universal Health Care Scheme (MUHCS) hi 2025 April 1 atanga hman tan turin sawrkarin a ti a. March 19-a chief minister-in he scheme a khuhhawn tumin private damdawi in hoin an zawm ve nghal thei lo, tiin thuthar thehdarhtute zawhna a lo chhang tawh. March 27 khan MUHCS hi Fedration of Mizoram Govt. Employees & Workers (FMGE&W) chuan an zawm ve theih rih loh tur thu sawiin an zawm theih loh chhan hi chief minister hnenah an thlen tawh a; Non Government Hospital Association of Mizoram (NGHAM) chuan March 28 khan Mizoram Health Care Society chief executive officer hnenah MUHCS hi an zawm ve thei dawn lo tih ziakin an thlen ve leh a; hemi ni vek hian Health department chuan Mizoram sawrkar hnuaia health care scheme kalpui mekah empanelled hospital ni thin damdawi in 28 chu a hnuk dawk tih hriattirna a tichhuak.
NGHAM-in MUHCS a zawm ve theih loh chhan a thlen danin, MUHCS Draft Guidelines, Draft Claims Management & Adjudication Guidelines chu uluk taka enhoin an zirchiang a. Private hospital-te chu nitina sum lut (daily income/ hospital bill) hmanga kal hram hram an ni a, cashless a nih chuan an inenkawl zo dawn loa, hospital sum chevel a buai phah dawn avangin hospital kal zel a harsat phah dawn tih a sawi.
Hun kal tawha Mizoram sawrkar hnuaia health care scheme hrang hrang, cashless-a kalpui a lo nih tawhnaah NGHAM member-ten sum tam tak an hloh tawh a, an hriat theih chinah belhkhawmin cheng vaibelchhe 4 chuang an hloh tawh tih a sawi bawk.
Sawi tur tam tak a awm chungin heng thil pahnih avang pawh hian Mizoram Universal Health Care Scheme duan, cashless chu an zawm thei loa, hemi avanga mipui tawrhna nasa tak thleng thei pumpelh a nih theihnan a hmaa sawrkarin re-imbursement system-a kalpui ang khan kal leh phalsak turin an ngen tih a sawi a ni.
NGHAM hruaitute chuan, sawrkarin health care scheme a duan chu an zawm leh zawm lohin an tan harsatna a thlen ve ve a, ‘cashless’ chu ram changkang zawkah health insurance company-te kalpui dan reng, thil tha leh duhthusam a nih rualin, sawrkar leh insurance company inan lohna chu, insurance company-te chuan hospital rate siam ang an pek mai laiin, sawrkar chuan a rate neihsa angin, rate hniam tak pek a tum tih an sawi. Chu chu an hnen pan damlote khawl hman man, damdawi man leh inentir man hrang hrangah tuna sawrkar kalpui tum dan a ni a, sawrkarin a rate ang a pek sak bak zawng chu damdawi in-in a chawi sak dawn tihna a ni a, damdawi in an kalpuina atana senso nen an inrem thei lo tih an sawi.
Sawrkara rawtna an thlen zingah, sawrkarin a rate siama damlo enkawlna man a pek sak bak, a daihlohna chu damloin pe ve mai se an ti a; sawrkar hospital-ah pawh an rate siam hian a daih famkim dawn loh avangin damloin an lei ngai a awm dawn tho niin an ngai tih sawiin, an rawtna hi sawrkarin a pawmpui thei si lo tih an sawi a ni.
Hetihlai hian Health minister chuan, damdawi ina inenkawlna man cashless-a kalpui chu policy-a an lo tiam tawh a nih tawh avangin an kaltlangpui lo thei lo niin thuthar thehdarhtute a hrilh a. Chumi atan chuan sawrkar damdawi in hrang hrang pawh tihchangtlun mek a ni, tiin, chief minister-in private hospital-ah hian an lo invenna atan an bank account-ah cheng nuai 50 dah lawk an inhuam thu a sawi bakah bill pek tlak chhung hi a rei lo berah ni sarih nise, a rei berah ni 30 nise, hemi chhunga sawrkarin a pe hman lo a nih chuan a interest chawi an inhuam tih private damdawi in hi a hrilh a. An sawihonaah pawh hlim takin an inthlah niin an lo ngai tih a sawi.
Sawrkar hnathawkin an tum ve tur chungchangah pawh sawrkar hnathawkte contribution tur chu an luh tirh (entry basic) atanga chhut niin, chu chu 1% vel a ni a. Tuna an hlawh (existing basic) atanga chhut phei chuan 1% a tling mang loa, hlawh pumpui (gross salary) atanga chhut phei chuan 0.5 – 0.75% vel chauh a ni tih a sawi a ni.
“Sawrkar hnathawkten MR bill hi thawhkhawm a, intumchawp anga ngaih dan a awm thei a. Hei hi a nihna takah chuan contribution an pe chung pawh hian, sawrkar chuan 75% vel an damdawi bill a la chawisak dawn tho a ni. Sawrkar laipui hnuaia thawkte hian central health care scheme-ah thla tin contribution an pe thin a. Pay Comission azir zelin an contribution zat hi siam danglam thin a ni. Health care contribution hi mi tih loh dan emaw thil thar hlak emaw a ni lem lo,” minister hian a ti.