Private hospital-te sawiho pui tura sawmna an la chhanglet lo – Adviser to CM

Private hospital-te sawiho pui
tura sawmna an la chhanglet lo
– Adviser to CM
Mizoram Universal Health Care Scheme chungchangah private hospital-te sawiho pui tura sawrkarin a sawmna tun thlenga an la chhanglet lo chu mak an tih thu adviser to chief minister TBC Lalvenchhunga chuan a sawi.
Thawhtannia ZPM party office-a inkhawmah adviser to CM (Finance) TBC Lalvenchhunga, MLA chuan, sawrkar hmasa hunlai anga cheng vaibelchhe 20 vel daha health care kalpui ve tawp leh a hnua leiba tlingkhawm ang kha pumpelh an duh tih a sawi.
Sawrkar hmasa khan private hospital-ten ‘package rate’ hmang ve tawh se, tiin a nawr a, an innawr tlu tep tihah a tlawm san leh si a, private hospital rate hmangin MR bill a kal a ngai thin a, re-imburse theite rate chu a dang deuh bik ni pawhin a lang thin tih a sawi bawk.
Hei vang hian sawrkar chuan ‘standard package rate’ duan tha a ti a. Mizoramah private hospital-ten theihawp an chhuah a, investment-ah an hmang tih sawrkarin a hriatpui avangin duhsak takin Delhi leh Mumbai a hospital thate nen rate inangin a siamsak bakah cheng nuai 50 thleng dahkham a inhuam tih CM adviser hian a sawi.
“Private hospital-te hnenah pawh an harsatna sawrkar nen sawiho tura sawm nimahse, vawiin thleng hian a chhanna kan dawng lo hi mak kan ti hle. Sawrkar chuan private hospital-te nen tangruala mipui tan theihtawpa thawhho kan duh a, ruahmanna famkim lo awm pawh sawiho kan inhuam reng a ni,” a ti.
ALT Road chungchangah sawrkarin Central Road Research Institute ruaiin tha zawk leh tlo zawka siam dan tur a ngaihtuah a, vawiin mai ni lo nakin hun thleng sawrkar chuan a thlir tih TBC Lalvenchhunga hian a sawi.
“ZPM sawrkar hian chhim lam mipui a ngaihthah loa; sawrkar hmasa hunlai anga tum khata sum hman zawh phak bak in-sanction khum vak vak leh a hnua K-Deposit a dah ngai leh si ang khan sawrkar thar hi kal a tum lo,” a ti. Sawrkar hmasain kawng leh lei thawmthatna atan sum a lo dah pawh sawrkar tharin vbch. 30-in a tipung a, nikum chhung khan kawng hlui thawmthatna atan leh kawng thar siamna atan vbch.400 a theh chhuak tih a sawi bawk.