Private practice chunga NPA lak…

Mizoram sawrkar hnuaia thawk doctor-ten allowance an neih pakhat Non Practising Allowance (NPA) chu a nihna tur ang ni lova la thin an lo awm ni ngei tur a ni a, tunhnai khan sawrkar chuan health & family welfare principal director hnenah titawp turin a hriattir a.
NPA hi sawrkar hnuaia thawk medical doctor ten an lak thin a ni a, mahse private practice an neih loh chauhvin NPA hi an la thei thung. NPA rate hi 6th Pay Commission hnuaiah khan hlawh atanga 25% a ni thin a, thahnem tham ve tak a ni. 7th pay commission hnuaiah hian NPA rate hi 20% a ni ta awm e.
Medical doctor-te hian private practice nei lo tura an intiam chauhvin NPA hi an la tur a ni a, private practice nei lo tur anga hming ziah hnan thlap chunga intiam si, mahse NPA la thei tho si an awm tihna a nih hmel a; hetia sawrkarin dik lo taka NPA la thin tihtawpna tur hriattirna a tihchhuah takah chuan.
A bikin khawpuiah chuan mihring kan lo tam a, damlo pawh kan lo hnih-thum deuh nge nge a. Sawrkar hospital-a inentir hman lo emaw inentir thei lo emaw tan, private clinic pan tur a lo awm remchang hi damlote tan chuan thil remchang tak mai a ni awm e. Chutih rual erawh chuan, sawrkar hnuaia thawk doctor, private practice kalpui bawk site hian (dik lo taka NPA an lak leh lak loh chu eng pawh lo ni se) hna an thawhna bulpui zawk sawrkar hospital lamah hian hun an hman rei loh phah thin em aw tihtur a ni a. Damdawi in lama damlo buaipui ngaite tana a nihna tur anga hun pek tam theih loh phah nana private practice hian a tibuai thin a nih chuan a khawi lam ve veah pawh doctor tan ‘efficiency’ an pe thei lo ang a, damloten an tawrh phah ang tih hlauhawm tak a ni.
Sawrkar lam danah hian, duhthlan theihna dan a awm a nih chuan, doctor-te hi an demawm hran lo ang a, mahse dik lo taka NPA lak erawh a dik chuang lo. Hetiang deuh nuaih a nih takah chuan, tun hnuah hi chuan doctor-te pawh an indaih chho ve ta bawk a, tunhmaa loh theih loha pawn lama doctor tlan kual (visiting) ang kha a ngai tawh lo deuhvin a lang bawk a, sawrkar hnuaia thawk doctor-ten private practice an kalpui tawh lohna tur dan te pawh hi siam a tul tawh zawk a ni lo maw, a tih theih awm e.