Pro Fight title fight
WELTERWEIGHT
Lalruatzela Hauzel (Mission Veng) bt Vanlalruatpuia (Saikhamakawn) = Unanimous Decision
Kum 22 mi Ruatzela’n fimkhur taka inbeihnaah hnek chhuak tam zawk a nihna a hlawkpui. A pantu zawkah tangin a hnuai leh chunga a hnek zawnin awmzia a neih bakah round hnuhnung berah vawi thum hnek fuh zawnin a langsar zawk.
Kum 19 mi Ruatpuia’n a hman thiam a vei lamin vai fuh chang nei mah se a bet zawkah a tang a, chak tur khawpin a bei let zo lo.
LIGHTWEIGHT
HC Lalramfela (Chawngtlai) bt C. Lalhruaitluanga (Cherhlun) = Split Decision
Kum 28 mi Ramfela’n kum kal ta title fight-a a tlawmna chhang letin kum 21 mi Hruaia lakah awlsam lo takin a chak a, kum riat hnuah a champion leh. 2015 khan bantamweight title a hnek chhuak a, a kum lehah a humhim zo lo.
Light-ah insawnin 2022 title fight-ah Vanlalawmpuia a hneh lo va, kuminah hriam zawkin a kir leh tih a nemnghet a, a vawi hnih nan a champion rualin Pro Fight weight hrang pahniha champion thei zingah a tel nghal bawk.
WBC INDIA SUPER LIGHTWEIGHT CHAMPIONSHIP
Gugan Kumar (Chennai) bt Vanlalawmpuia (Khuanthing) = Technical Knockout
Pro Fight lightweight title kalsanin kum 26 mi Awpa’n WBC India super light title a chuh a, round hnihnaah technical knockout-in Chennai boxer Gugan a hneh. Khuangthing fighter hian a tir atangin hnek tluk a tum nghal a, feet 6-a sang Gugan invengin a tawlh kual a, a ban phak atangin a hnek let. Round hnihnaah hnek na leh ngampa zawk Awpa’n a ding lamin a hnek tlu a, a thawh leh hnuah umin a ding lamin a vai tlu leh a, second 11 a la awm tihin referee Ajay Salvi chuan a titawp.
Awlsam takin Awpa a chak a, professional huanga vawi sarih a chakna niin knockout hmanga hnehna a chan tum ngana a ni a, Laldingliana leh F. Zoram-chhana’n Zirtawpni zanah hlawhtlinna chang tawhin Mizo pathumin WBC India title an hnek chhuak.
FLYWEIGHT
NT Lalbiakkima (Siaha) bt Vanlalenkawltira (Champhai Dinthar) = Split Decision
Biakkima’n rang taka a hnek zawn thin chhawrin tunlaia hmasawn Enkawla lakah split decision-in a chak hram a; entute zingah kum 27 mi Siaha fighter hi chak lo zawka ngaitu leh result demna social media lamah a ring. Biakkima hian vawi nga champion HC Johnkenty Vanhlimpuia kalsanin Pro Fight chanchina tum ruk champion hmasa ber a ni a, a bitum zawng zawng a la hneh vek. Professional boxing-a a chak vawirukna a ni a, knockout ni lo point hmanga a chak hmasak ber a ni.
Kum 20 mi Enkawla’n a chak loh dan pawm har a ti viau a, a lehpekah chak ngei turin a kir dawn tih a intiam. Professional a khelh tum hnihna ni nghalin a hmain a bitum nen an inhnehtawk a ni.