Pro Volleyball League: A hun a thleng dawn ta!
EverHome Pro Volleyball League chu LPS Arena, Falkland-ah zanin, April ni 29, Thawhlehni zan dar 8-ah hian tan a ni dawn a, trophy inchuh tur mipa team parukte zingah Mizo hlanga vawikhat champion tawh Thutak Nunpuitu Team leh Tuichangralin match hmasaber an khel ang.
Nimin lamah team pathum – Thutak Nunpuitu Team, Tuichangral leh Khawbel kan bihchiang tawh a, tuntum hian team dang pathum Sihphir, Anastasia Electric Veng leh Hunthar bihchianna kan han tarchhuak leh ang e.
-- Advertisement --
SIHPHIR
Pro Volleyball-a an tel vawikhatna turah Sihphirin a tikimtu nih ringawt an tum lo a, Indian Navy player Niyas Addul Salam an lalut dawn a, thlaveng atan Javed Khan an be fel tawh bawk.
Tun season Pro Division inelnaah Sihphir an chetha lo a, Invitation Cup-ah semi-final lut pha loin MVA Cup-ah team pali an inel a, a hniam ber ni chungin tournament an khar.
Kumi atan an hmabak a hautak a, Pro Volleyball-ah danglamna thlentir tumin an veng hall-ah ngawrh takin an inbuatsaih.
Coach Lalchhuangliana chuan an khelh hmasak bera an chet danin an hma lam hun a hril hle dawn tih a sawi a, tun tum hi Pro Volleyball awm tawha team hrang hrang an intluktlan ber a nih a ring. TNT chu team tha sa an ni a, team dangah state pawn atangin player tha tak tak an lalut a, tute mah hi hneh awlsam an awm lo ang tiin a sawi.
Kum 2022-a Durtlang North champion-puitu Chhuangtea chuan, “Thil awm dan tur sawilawk a har a; ball vuak lak kawngah Sihphir player-te an tha tawk lo deuh a, chuvangin fitness nei tha tur leh tlo taka khel thei turin kan inbuatsaih a, ka player duh zawng Niyas kan nei thei bawk a, kan khelh dan azirin Sihphir khawtlang pawhin boruak an neih len theih ka ring,” a ti.
Sihphirin tunhnaiah Khawhai player hriat hlawh tak Lalhmunmawia an senglut a, Pro Volleyball-a tawnhriat nei tawh Thangminlal Guite, H. Lalrinmawia, PC Lalnuntluanga leh setter H. Lalruatsanga bakah 2022 champion Durtlang North team zinga tel Samuel VL Nunhlim an kawl bawk.
Sihphir squad
Mesak Malsawmkima, Lalhriatchhunga, Nelson Zothanpuia, Lalthantluanga, Francis Lalrintluanga, Lalrinhlua Hnamte, Lalneihkima, PC Lalnuntluanga, H. Lalrinmawia, Albert Zothankhuma, H. Lalruatsanga, Thangminlal Guite, Daniel Lalnunmawia, Lalhmunmawia, Samuel VL Nunhlima, Niyas Abdul Salam, Javed Khan
Coach: Lalchhuangliana
Assistant Coach: RD Fanai, Lalkapsanga
ANASTASIA ELECTRIC VENG
Champion tumin Mizoram inelna sang berah Anastasia an kir leh a, Pro Volleyball hmasa ber kum 2016 khan final-ah TNT hnehin an champion a, kum 2018 leh 2019-ah tel zui mah se an thleng sang zo lo ve ve.
Tun season Pro Division-ah team ruk awmin Pro Volleyball khel thei loin Durtlang North leh Chhinga Veng Spikers-in hrem an tuar a, hmun ruak pahnih hnawhkhahna’n April thla tir khan playoff buatsaih a ni a, team pathum inel zingah Anastasia sang berin Hunthar nen an tling.
Electric Veng club hian NIS coach PC Lalhriatpuia an ruai a, kum ruk hnuah Pro Volleyball-ah kir lehin, an tel rau rau a nih chuan champion ngei an duh a, team tichak turin state pawn atangin Yougank Baliyan an lalut a; ani hian nikum khan Chhinga Veng tan khelin league-a point thawkchhuak tha ber a ni.
Anastasia hian Pro Volleyball-a hriat hlawh tak ni thin Laldensanga bakah R. Lalhriatrenga, Helly Vanlalliana leh player beiseiawm tak tak an kawl a; inelna sangah mikhual lo turin inelna lianah club-in tawnhriat tha tak a nei fo tawh a, nikum June khan TNT buatsaih division sang ber Pro player tel theihna Mizoram Open tournament, Lungleiah an champion a ni.
Anastasia Electric Veng squad
R. Lalhriatrenga, Helly Vanlalliana, Lalthlamuana, Laldinsanga, Ramdintluanga, Joshua Lalrempuia, Lalruatsanga, Laldensanga, Rochanpuia, Peter Lalpekhlua, Yougank Baliyan, PT Lalhlimpuia, Lalrinawma, Ngursangzuala, Lalhunthara
Coach: PC Lalhriatpuia
Assistant Coach: Vanlalpeka,
C. Lalrotluanga
HUNTHAR
Pro Volleyball League-a team hlawhtling ber leh vawikhat aia tam champion thei awmchhun Huntharin title humhim thei turin hun tha an nei.
May 2024 khan a vawithumna’n an champion a, hlim taka trophy an lawm hnuah harsatna tawkin Pro Division-ah an awm zui thei lo.
Hei hi an dinhmun ni mah se playoff hmangin Mizoram inelna sang berah an kir leh thei a, trophy humhim tura an inbuatsaihna kawngah nikuma an champion theihna kawnga thawh hlawk tak Delhi spiker Anirag Rawat an lalut leh.
Coach VL Malsawma Renthlei chuan division hniama awm an nih avangin Pro Division inelnaa tel turin an player-te an tha tawk lo tih a sawi a, chutih rualin Pro Volleyball atan state pawn player bakah Mizo player pathum aia tam an lak belh theih avangin team thar leh title cho ngam din tumin tan an la a ni.
Kum 2024 champion team zinga langsar spiker Fabian Lallunghnema leh setter Remsangzuala an hmang thei tawh dawn lo a; veteran setter Ramtharnghaka lalutin Laldampuia, Lalramhluna, Ramgaihsangate hoin Anurag an thawhpui a ngai dawn a ni.
Pro Volleyball mipa inelnaa la tel kim vek team pahnih zinga mi Huntharin kum dang angin boruak an nei lian lo va, a chhan chu Pro Division-a awm sa an nih loh avangin Mizo player langsar an seng khawm thei lo. Chutih rualin volleyball nen inzawmna thuk tak an neih tawh avangin an lakah beiseina a awm tho a ni.
Hunthar squad
Laldampuia, Isreal B. Ramdinsanga, Lalbiakmawia Khiangte, Lalliansanga Kawlni, T. Vanlalpekhlua, PC Zoramthara, Ramngaihsanga, Joseph Zairemtluanga, Lalchhuanmawia, Rohluzuala, Timothy Vanlalrinawma, Malsawm Lalruatpuia, Lalhriatzela, Lalramhluna, C. Lalngaihawma, Lalthanzuala, Ramtharnghaka, R. Malsawmkima, Lalrinfela, Anurag Rawat
Coach : VL Malsawma Renthlei