Pro Volleyball League lawmman pung dawn

Pro Volleyball League lawmman pung dawn
Thla thara khelh tur Pro Volleyball League lawmman pawisa fai tihpun a ni dawn a, club-te’n Mizoram pawn atangin player an duh zat an lalut thei dawn bawk.
Mipa team paruk – Durtlang North, TNT, Hunthar, Chhinga Veng Spikers, Tuichangral leh Tuipuiral bakah hmei-chhe team pasarih – Bethlehem Vengthlang, Bungkawn, Durtlang, Kanan, Power Depart-ment Sporting Club, Armed Veng South leh Luangmual an inel ang.
Kum hmasa aiin team tel paliin an tam dawn a, June ni 2 atanga ni 30 chhungin R. Dengthuam-a Indoor Stadium, Mual-puiah khelh a ni ang.
Working Committee chuan a hma aia tel an tam avangin lawmman pawisa fai semchhuah tam a ngai dawn hrim hrim a; chutih rualin champion leh team dangte’n pawisa an hmuh thin tihpun a ni dawn tih sawiin, a zat tur tak erawh bituk an la siam fel lo.
Nikumah mipa team nga leh hmeichhe team li an chhuak a, mimal chawimawina tel loin team tan Rs. 4,15,000 semral a ni.
Kalphung pangngai angin team tinin Mizoram pawn atangin an duh zat player an chawlut thei a, mahse, khelmuala lut player paruk zingah pakhat bak an chhawr thei dawn lo a ni.
Boruak lian leh inelna sang zawk a awm theihna’n hma lak zel an tum rualin, an ngaih-pawimawh ber erawh Mizote hmasawnna tur a nih thu an sawi. Club-te’n harsatna an neih hriatthiampui chungin thutlukna pawimawh siam zui zel a nih ang tih an sawi bawk.
Working Committee chairman C. Lalrokhuma chuan: “Mizoram pumah volleyball khel an pun zel avangin Pro Volleyball-in kum dang aia ngaih-hlut a hlawh phah ka ring a, entu pawh an pun ngei ka beisei.
“Tun tumah hian kan thawhpui LPS Vision-in sum leh pai enkawlna leh inrelbawlna kawng hrang hrangah thuneihna sang zawk min pe a, Mizoram Volleyball Association tan chona lawmawm tak a ni,” a ti.