Aizawl Municipal Corporation-a sum hman dan, a bikin property tax hmannaah ruling corporator-te an invulh nasa hle nia a a lan thu opposition corporator-te chuan an sawi a. MNF enkawl municipal-ah House hriatpui loha thil tih a tam tih an sawi.
ZPM leh Congress corporator-te sawi danin, Aizawla cheng mipui chhiah pek khawm – property tax chu a khawntu lo local council hnenah zaa 5, AMC-in hnathawh zuina atana a tula a hman atan zaa 15 dah niin, zaa 80 chu chhiah petu mipui hnenah ward tin corporator-te kaltlanga inzat theuha sem tur a nih laiin, tun term kal mek, 2021 atangin an dawn tur zat dawn kim thap an la nei lo.
2023- 2024 kuma AMC-in property tax-a a hmuh zat chu cheng nuai 600 niin, local council (5%) chan nuai 30, office administration (15%) nuai 90, corporator-ten an ward tana an hman tur (80%) nuai 480 a ni a. Ward tinin nuai 15 theuh an dawng a, a vaia belhkhawmin nuai 285 a ni a, a bak nuai 195 chu a hmanna an hriatpui ve ta lo tih an sawi.
AMC budget-ah property tax hmuh zat tarlan thin a nih laiin, a hmanna erawh tarlan a ni ngai lo tih ZPM corporator Christina Roluahpuii Sailo chuan sawiin, “Kum 2021- 2022 khan nuai 12 theuh dawng tur kan ni a, nuai 7 kan dawng. 2022- 2023 ah nuai 10 theuh kan dawng a, kan dawn tur zat nia sawi kan dawng kim chuang lo. An duh zat zat an fix a, a bang hi engatana hman nge kan hre lo.Kan zawh pawhin mumal takin min chhang thei lo,” a ti.
Kum 2023-24 a AMC budget cheng vaibelchhe 117 chuangah AMC-in a thawhchhuah ve tur 10% vel leh 15th Finance Commission atanga Urban Local Body grant leh state sawrkar atanga grant -in- aid 90% velah sum thawkchhuak belh a, intodelh ve theihna tur lam ngaihtuah aiin, thil te tham te tea party mi invulh a, induhsak an thlang zawk tih opposition corporator-te hian an sawi a. Kum 2021 atanga tun thlengin party mi invulh nana hna tereuh te te an pek zat hi a sumin Rs. 309,232,050 a ni tih an sawi a ni.
In sak, lei laih leh dawr hawn phalna licence dil ngaiah dilna a thang rei thei hle a, an ward mipuiten nawrpui tura an tiha an nawrpui chuan, awlsam takin a chhuak leh mai lawi si, tiin, office inrelbawlna mumal zawk AMC-in a mamawh hle tih an sawi.
House kaltlang loa thil tih a tam a, a system a dik lo. Board of Corporators thutkhawma thu pass an ngaipawimawh loa, bawhzui loh tam tak a la awm,” Congress corporator Rosiamngheta chuan a ti.
Solid Waste Management Centre Tuirial a bawlhlawh paihna hmuna bawlhhlawh inchhekkhawm tam lutuk tih ziaawm nana state sawrkarin bawlhhlawh halralna khawl – incinerator leina tur cheng vaibelchhe 2.74 vel, Hyderabad atanga an lei chu bun fel tawh ni mah se, mumal taka hman theih a ni lo a, a khawl supply-tute sawi danin darkar 24 chhunga bawlhhlawh ton 10 halral thei tura ngaih a nih laiin, a takah erawh ton 1 pawh a halral hleithei lo tih an sawi bawk. Kg sing khat vel darkar khata halral thei turah kg. 1000 (pik up trip khat) vel chauh a halral thei tih ZPM corporator Malsawmzuala Ralte chuan a sawi.
Property tax hmanna hre vek lo “House hriatpui loh thil tih tam” – Opposition corporators
Get real time updates directly on you device, subscribe now.