Service inepna dahtha ang – CM Thawktu indaih lo siamrem tum

Sawrkar tha leh chak nei turin service hrang hrang inkara inepna awm thin chu dahthaa thawh ho thiam a tul tih chief minister Lalduhoma chuan a sawi a. Office-a thawktu inkhaidiat chho inkhuang rual lo awm thin chu enfiah a, siamthat bakah a tul a nih chuan department sawikhawm thlenga ngaihtuah a tul dawn tih a sawi.Thawhtanni khan chief minister ho hian ministers, advisers to CM leh Mizoram sawrkara joint director chin chunglam zawng bakah DC leh SP zawng zawng telna Inter Departmental Meeting chu Aizawlah neih a ni a. Sawrkar duhdan inhrilh a ni.
Kalphung thar, mipui sawrkar din an tumnaah sawrkar hnathawkte chu sawrkar ruhrel an nih avangin thinlung hrisel pu chunga tunhmaa an lo tih ngai loh pawh ti thei a, a tha zawnga ram thlak thleng thei nih tum turin an chah tih Lalduhoma hian a sawi a. Tuna an kal mek dan aia tha zawk kal dan tur an hriat chuan, a thehluttu ziahlan kher loh pawhin a hnena thlen turin a chah.
Sawrkar hnathawk zinga service inepna awm thin chuan thawhhona a tichhiat avangin he rilru hi dahthat a ngai tih a sawi a. “Mizoram First” tih chu thupuiah nei a, thil tha lo hnawl ngam, a tul huna “aih” ti ngam an mamawh tih a sawi.
Department thenkhatah thawktute inkhaidiat chhoh danah inkhuangrual lo lutuk awm chu siamthat tum a ni tih chief minister hian a sawi a. Department tin chu hetiang chinfel a nih theih nan office hrang hranga thawktu awm zat leh mamawh dan zirchiang tura tih an ni, tiin, department thenkhatah an hnathawh tur chin inluh thelh awm nual chu enchian a ni bawk dawn tih a sawi. “A tul a nih a, sawrkar kal dan a that zawk dawn chuan department sawikhawm pawh tih mai tur a ni ang,” a ti.
Sawrkar hnathawkte chu mipui rawngbawltu an nih angin mipui tan awlsamna chhawpchhuah thiam a ngai a. Tunlai thiamna hmanga chak leh rang zawka thil tih zung zung theih a tul a, hei hian hna muang lutuk leh ‘middlemen’ awm thin a tibo tura ngaih a ni, tiin a sawi. Langtlang sawrkar neih an duh a, conduct rules leh dan zawm ngaite zawm chungin, sawrkar policy-a rinawm turin a chah.
“Thuruk vawn ngaite kan vawng anga, dan chunga leng tumah kan awm loh avangin hnathawktuten tha takin dan kan zawm dawn nia. Sawrkar hnathawk social media lama hming lem invuaha conduct rules bawhchhia an awm pawhin kan umzui zel dawn a, confidential document thehdarh chenin kan pumpelh a ngai. Kan sawrkar hian mipui aw ngaihthlak zel a duh avangin ‘Mipui Aw’ online kan nei a; CM office atangin kan lo vil reng a, a mawhphurtuten tha takin lo kalpui ang che u,” Lalduhoma hian a ti.
Eirukna tih bo an duh a, sawrkar hnathawk leh consultancy firm inthurual, supplier thurualpui neihte chu eirukna bul a ni fo, tiin, hetiang awm lo tur hian an khauh dawn tih a sawi.
Home minister K Sapdanga bakah minister dang leh adviser to CM ten thu an sawi bawk a. Official kalkhawmte nen hian inkawm ho zui a ni.
CM thusawi dang:
8 Sawrkar hnathawkten Annual Property Returns a hun takah file ngei ngei tur a ni a, a tel loin vigilance clearance kan pe dawn lo.
8 Hnathawh quality tha chauh neih kan tum avangin Project Monitoring Committee chak tak kan nei a, officer-ten tha takin in lo thawhpui dawn nia. Project zawng zawng hi CM Dashboard hmangin kan endik (monitor) vek dawn a, tumah inthlahdah theih a ni dawn lo.
8 Hna reng reng administrative approval, expenditure sanction leh work order awm loin tuman lo thawh tawh loh tur a ni. Chutiang ti an awm chuan sawrkarin kan umzui loang.
8 Departmental work reng reng a changtu minister phalna la hmasa loa thawh phal a ni lo. Department ten eng project pawh kalpui tum se, Planning leh Finance department kaltlang loa proposal thehluh phal a ni lo.
8 K deposit-ah pawisa dah a tam em em a, kum thum leh a aia rei K Deposit reng reng department ten lo chingfel thuai turin kan duh.
8 Tawngkaa tih tur inhrilh thin hian sawrkar kalphung a ti chi ri a, a hnu zelah phurrit siamtu a nih theih avangin, chunglam atanga tawngkaa tih tur hrilhtu hnenah a thil sawi chu bawhzui ngei tur a ni tih tihchianna a rang thei ang bera ziaka hrilh turin ngen ang che u.
8 Hna phung inang department hoin supplier leh contractor intawm an neih theihna tur cabinet-in a pawmpui a. Tuna department malin anmahni hnuaia inziaklut contractor/supplier bik an neih ho pawh cabinet-in a ennawn mek.
8 Entrepreneur tha leh rintlakte suppliers/ contractors/ consultants a ziahluh leh hman an nih theih nan sawrkarin inkaihhruaina a neih chu huam zau zawka kalpui tum a ni. Contract/ supply khawih theih chin an ‘work experience’ bituk siam pawh ennawn a ni.
8 Sawrkarin Year of Consolidation a kalpui mekah department tinte inrenchem taka kal tur a ni a. Lirthei lei, office bungrua lei thar emaw hnaruak hnawhkhah thlengin, loh theih loh thil a nih loh chuan inhrek rih tur a ni.
8 Sawrkar sum lakluhna lamah kawng thar dap pahin tuna sum lakluhna te ennawna siamthat ngai siamtha tura tih an ni. Sawrkar check gate hoah sum luangrual awm loh nan a kaihhnawih hotuten endik fo thin tura tih an ni.
8 Hand Holding Policy a hlawhtlin nan line department-ten mawhphurhna sang tak in nei dawn a, partner pawh hi duhsak bik nei loa a hlawhtling thei turte chauh thlan tur a ni. tiin sawrkar flagship policy kalpui dan pawh a sawi a ni.