Provisional adhoc-a dah phutin school promotion result hreng

Pro adhoc school zirtirtute chuan provisional adhoc-a dah phutin tiamchin awm loin school promotion result an hreng mek.Mizoram Pro Adhoc HSS Association leh Mizoram Pro Adhoc HS/MS Association thuchhuak chuan, hun rei tak ata khawtlangin a enkawl school ho Mizoram sawrkarin provisional adhoc-a hlankai mai tura a ruahman ni si, Provisional Adhoc Rules peihfel vek leh gazette vek tawh, tunhnaiah Lump-sum Rules hmanga kaihhruai a tum chu khawtlang leh zirtirtuten hriatthiam har an tih thu an sawi.
‘Provisional adhoc status beiseiin kum thum dawn hun kan hmang ta a, thenkhat chu service kum 5 chauh nei tawhte pawh an awm. Khawtlang tana zirna buatsaih a, kan hun tam tak zirna a lo hlan tawh kan ni a, kan beisei loh lama min kuai her hi a pawi kan ti hle,’ a ti.
School upgradation chu dan kalh a nih thu sawi chung si a, an ruala upgradation kalpui adhoc school-te sawrkarin provincialise a tum leh si chu mak an ti a, chutiang a nih tak avangin an dinhmun tur dik tak, provisional adhoc-a dah turin an phut tih a sawi a ni.
‘Kan dinhmun tur a chian hma chuan, Assembly resolution-in a pass angin, promotion result pawh tiamchin awm loa hren (witheld) mek a ni a, sawrkar hian kan harsatna min hriatsaka kan chanvo – provisional adhoc-a min dah turin kan phut a ni,’ a ti.
Hetihlai hian Thawhlehnia Assembly Session-ah School Education minister Dr Vanlalthlana chuan member-te zawhna chhangin, sawrkar atanga phalna an dawn ve leh school upgradation order tih chhuah a nih tur thu a sawi.
By circulation-a pass tawh angin, school provincialise tur hian 2023 Upgradation Rules-a tlingte an dah dawn a. 2023-ah hian lo la tling chiah lo mah se, 2026-ah an lo tling chho tawh a nih chuan ‘humanitarian ground’ in provincialise mai tur a ni tih a sawi. Provincialisation bakah ‘pro adhoc’ ho chu kal tir zel turin dan awmsa in a phal tak loh avangin rules thar an buaipui mek tih a sawi a ni.