PSG-ah Mbappe a hlim lo

France forward Kylian Mbappe chuan kum nga chhung atana Real Madrid nen inremna an peihfel hnu lawkah Paris St-Germain lama a kum tawp berna a hman dan sawichhuakin, mi thenkhat leh thil thleng thenkhat avangin a hun hnuhnung lamah khan Paris-ah a hlim lo tih a sawi.
Tarlan tawh thin angin, kum 25 mi Mbappe Paris St-Germain contract neih lai hi June ni 30 hian a zo dawn a, an inremna tawp rual hian kum nga chhung atan Real Madrid lamah a insawn tawh dawn a, a chhuahsan tur club-a a final year-ah lawm lohna neuh neuh a lo nei tih tunhnaiah a sawichhuak.
Nikum August thla khan PSG player awm tawh zawng zawnga goal khung hnem ber ni mek Mbappe hian PSG-a a contract neih lai pawhsei a hnial fithla ve ta a, chu mi nghawng kal zelah first-team ruala training lohte a han hringchhuak lawp lawp a, Tunkar Thawhlehni khan a hun tawn thenkhat sawichhuakin:
“PSG-ah khan ka hlim lo. Nangmah chawmtu kut i seh chuan a dik thei lo ang a, min venghimtute hmaia chilchhak pawh tih mi a ni ngai lo ang, mahse, chuti chung chung chuan thil thlengte leh mite avangin ka hlim lo.
“Hruaitu (captain) ka nih miau avang erawh chuan thil thleng apiang tarlan zel ka tan a rem lo a, midangte vuivaina pawh tawmpui diak diak a rem chuang lo,” tiin thil thlen dan leh a lungawilohna mihringte erawh a puangzar thui duh lo.
Mbappe hian PSG boss Luis Enrique leh adviser Luis Campos-te chu amah chhanhimtu an nih thu tarlang telin, “Anni kha awm lo ni se la chuan khelmualah ka ke ka nghat leh tawh hauh lo ang.
“Inkhel thei tura ka paltlang ngai zawng zawng hre vek chunga ka season hman dan kha season liamta zawng aiin ka chhuang a, ka standard pangngai pha lo mah ila ka inkhel thei ringawt leh trophy engemawzat ka hui tho kha ka chhuanber a ni,” tiin Metz khawpuia France leh Luxembourg friendly match khelh dawna amah bawrtu chanchinbumite hmaah a sawi.
Mbappe hian PSG tan Ligue 1 title paruk a lakpui hman a, season thar atang chuan a trophy khawlbawma hmuh tur la awm ve lo Champions League winners medal dawng thang leh he trophy kawl mektu Real Madrid thuam inbel chungin Europe club inelna sangber trophy hi tha tharin a beisei ve tawh dawn a ni.