PSG in Mbappe hralh ngei an tum

French Ligue 1 champion Paris St-Germain chuan an player pawimawh Kylian Mbappe hralhchhuah ngei an tum a, club dang nen an indawr mek. Al-Hilal in £259million zet senga Mbappe lei an dilna chu PSG hian an pawm a. Mbappe hian Saudi Arabia club a zawm duh dawn em a la chiang lo thung.
Tunlaia footballer tha ber pawla ngaih Mbappe hian PSG-ah kum khat chiah contract a nei tawh. Contract thar a ziak lo a nih chuan nakum June thlaah free transfer in a chhuak thei dawn. Free transfer-a a chhuak a nih chuan a club thar tur chu Real Madrid ni ngei a ngaih a ni sa bawk. Football club ropui Real Madrid nen hian inremna an nei sa thlap niin an tarlang. PSG chuan manto taka hralh theih tur Mbappe hi contract thar ziak turin an nawr a, an hlawhtling zo lo. Contract thar a ziak lo a nih chuan an hralh tur thu an sawi chiang nghal bawk. An hralh tur thu tichiang bawk mah se Mbappe hi contract thar ziah a tum loh thuah a ding nghet ve fan bawk.
PSG hi Mbappe hralh an phal tih an hriat ve leh Saudi Arabia club Al-Hilal chuan lak theih dan kawng an dap nghal thuai. Al-Hilal hian PSG hnenah Mbappe hi khawvela player manto ber ni turin lei an dil a, kum 24 mi manah £259million an tawktarh. Heti zat sum tawktarh awm hi PSG hian hnar an tum lo hle a, Al-Hilal dilna an pawm fel nghal hmak niin tarlan a ni. PSG hian khawvela player manto ber ni turin Neymar an lei tawh a. Khawvela player manto ber ni turin Mbappe hralh thei dinhmunah an ding thar ve leh.
Club hausa zet mai Al-Hilal hian Mbappe hi an hnena a cham chhungin £605m zet a hlawh atan sem an huam niin tarlan a ni a. Golden Boy, World Cup-a rawlthar tha ber leh World Cup Golden Shoe lo dawng tawh Mbappe hian Al-Hihal a zawm a nih chuan kar khatah £11.5m zet a hlawh ang a, a contract hi infiamna huanga contract hlu ber a ni nghal bawk ang. Hetiang zat zeta tam hi hlawh thei dawn bawk mah se amah hi chuan Real Madrid zawm a la duh zawk fan niin an sawi.
Real Madrid pawhin Mbappe lak dan kawng an dap thar ve leh niin tarlan a ni a. Mbappe an lak theih nan an player then khat hralhin sum tuak an tum. Hralh an tum zingah hian Federico Valverde a tel a. Uruguay midfielder hi London club lian Chelsea in lak an duh niin sawi a awm bawk. An duh zawng hlah ngai lo Real hian an tum a nih chuan Mbappe hi an lak leh theih mai a rinawm.
PSG hin Mbappe hralh hman hmawh nachhan lian tak an nei niin sawi a awm thar. Mbappe hi an hralh thuai lo a nih chuan club laka a rinawm €60m (£52m/$66m) an pek thuai a ngai dawn. Hetiang zat lawi sen belh a, man leh mual awm lova chhuahtir leh tho ai chuan hralhchhuah thuai chu an tan hlawk zawk turah ngaiin hralh an hmanhmawh ta riau nia ngaih a ni.
Forward tlan chak, ball thiam leh finishing tawih Mbappe hian kum 2017 khan Monaco atangin PSG hi a zawm. Ligue 1 club lian tan hian inelna hrang hrangah vawi 260 khelin goal 212 a thun tling tawh a, PSG tan goal thun hnem ber a ni mek. An tana goal thun hnem ber Mbappe hi PSG hian chelh an duh em em a, an chelh thei dawn lo a nih rau rau chuan a hralhna atangin sum hlawm lian hai luh an tum tlat thung.