PSG leh Real Madrid inlan zan

Zanin zanlai ah UEFA Champions League last 16 playoff khelh chhunzawm tur niin, a hmawrbawk a ni dawn. Zanin hi champion lai Paris St Germain leh Champions League a champion ngun ber Real Madrid te inlan zan a ni.
Champion lai PSG hian an mual; Parc de Princes ah French Ligue 1 a en elpui As Monaco chu 3-2 a hmahruai chungin an mikhual dawn. Last 16 lut chiang turin PSG hian an mualah tlawm pumpelh an mamawh.
PSG leh AS Monaco te hi kar liam ta Thawhlehni zan khan first leg ah an intum a, mikhual an nihna hmunah PSG an vannei. Mikhual an nihna hmunah chhe takin bul an tan a, minute 18 chhung lekin si hnih an phur hman. Hma takah goal hnih chhuah hmasa huaisen takin an inlan a, chawlhlawk hmain goal hnih an thun hman hram a. 2-2 a inhnehtawk chungin chawlhlawk an hmang thei hram.
Chawlhlawk hnu lamah mualneitu team an che fuh lova, second half tan atanga minute thumna lekah Aleksandr Golovin hnawhchhuah a ni. Tam zawk an nih hnuin PSG an khel tha zui viau a, goal pawh an thun leh ta thuai. Desire Decoue goal thun hmangin hnehna an chang let a, Monaco an lehthal. Mimualah hnehna an chan vangin an dinhmun a tha a, hmahruaitu zawk ni chungin an mualah an inlan theih phah ta a ni.
PSG hi season liam ta khan inelna hrang hrangah an khel tha viau a, a vawi khat nan Champions League ah an champion ta hial bawk. Season kal mekah erawh beisei an phak ta chiah lo thung. League round ah top 8 huanga an awm phak loh vangin Playoff khelh an ngai. Playoff ah ram dang club lian pumpelhin an hriatchian Monaco an hmachhawn a. Monaco lakah beisei an phak lova, tam zawk ni chungin an chak thei hram chauh. Zanin hian an mualah tha zawka inlan an tum dawn a, lastb16 luh ngei tumin tan an khawh ang.
First leg a khel than AS Monaco pawhin PSG hi hneh theih an nihzia an hrechiang viau a. Second leg ah inlehthalna lian thlentir ngei tumin tan an khawh ve ngei dawn bawk. Monaco hi last 16 lut zo lova an tla a nih pawhin mak tih viau tur a awm hran dawn lem lo va. PSG an tla a nih erawh chuan thil mak a nih rualin mualphona nasa tak a ni tel thung ang.
Champions League a champion thiam tak Real Madrid chuan 1-0 a hmahruai chungin Benfica an mikhual ve dawn bawk. Real Madrid hian an mual Santiago Bernabeu ah awlsam zawkin chak an tum ngei dawn..
Real Madrid hian boruak sang tak leh sawi zui laih tur thil thlenna inkhelah Benfica hi Vinicius Junior goal thun hmangin an lo hneh tawh. Mikhual an nihna hmunah hnehna an chang a, an muala inlan zui leh tur an nih bawk vangin last 16 lut turin an dinhmun a tha hle.
Benfica hian Real Madrid hi League round hnuhnung berah an hneh a, Real Madrid in direct a last 16 an lut tur an dang. Team lian Los Blancos hi 3-1 ngawta an hneh vangin playoff an khelh zui phah hial nghe nghe. Tunhnaia maia an hnehte an nih vangin hneh theih an nihzia an hrechiang a, inlehthlalna lian zawk thlentir ngei tumin San Santiago Bernabeu ah tan an khawh ang.
Playoff first leg ah Benfica manager Jose Mourinho chu hnawhchhuah a lo ni tawh a. A club hlui Real Madrid a hmachhawn nawn leh hunah chak duhna lian zawk a neih phah dawn. An mualah tlawm a, last 16 an lut zo lo a nih chuan Real Madrid tan mualphona lian tak a ni dawn a. Mualpho pumpelh tumin thapui an thawh ang. Champions League ah vawk lal len bawk thin mah se tunhnaiah erawh Real Madrid boruak a hniam viau a, champion tura rinkai zingah an tel phak ta meuh lo. An ropuina nei let leh turin Benfica hneh a, last 16 luh an mamawh. La Liga lamah an hmahruaina an hloh fel deuh chauh a, UCL last 16 an luh phak loh phei chuan tlang sel an tawk nasa hle ngei ang.