Lalremliana Pachuau
-- Advertisement --
Kum 1984 a i hna duhawm tak, IPS nihna kalsana Mizoram tân hun puma rawng bawl tura ke i lo pen achin kum 49 zet i vahvaih hnuah, Mizoram Chief Minister ni thei tura thlan tlin i lo ni ta hi ka lawmpuiin duhsakna sâng ber ka hlan mawlh mawlh che a ni.
Nang ang taka mi beidawng har, mi tumruh, vakvai nasa ber, mite sawi chhiat leh rel hlawh ber, politician zingah mimal anga beih rawn hlawh nasat ber ti ta che ila, kan tisual duai kher lo ang! Congress, MNF, ZNP party lamah President i lo ni vek tawh a. Lok Shaba MP pawh i lo ni tawh bawk.
Inthlan dâwn apiangin boruak eng eng emaw han nei ve hluai thin mah la, beisei aia nasa daihin i chak lo leh thin. A châng leh Zoram dung leh vang fangin, kein kawng i zawh ang lâwp lâwp a. A châng leh a hma lawka i selte nen in han thawkho leh ang dial dial bawk. Mi tin ngaihven hlawh politician niin, nangmah hriat chianna nei lem lote pawh hian zuang lâwr ti chein, mak tak maiin an han ring lo êm êm mai che a! Nuihza siam nana hmang tâwk che lah kawi tinah an ther fûr bawk.
Pu Zorama leh Pu Hawlate’n ning hlûi khawpa Zoram an enkawl tawh hnuah pawh, nang chu chaurau ek thai tluk chauh i ni leh mai thin a. I beiseina a sân poh leh i tlakna a sâng ting ni maite hian a lang fo a nih kha. Mi tam takin an lo zui hlawhchham tawh chein, an lo phatsan tawh thin che a. Chuti chung chuan i la beidawng duh hauh si lo.
Mipuite hnenah chauh thubarawh tak meuh meuha khawngaih i han dil, i hun tawp lamah tal chuan nangmah khawngaih ve tawh tura Zoram mipuite min tahawh laite kha, hman lai an chang dâwn ta reng mai. Khati tak maia politika i tluang lo leh, rorêlna fawng chelh thei hauh lova Zoram mipuite’n kan hnawl leh thin hnuah che, tunah zet chuan tuma dodal rual loh turin rorêlna chu i kokiah nghahin a awm dâwn ta.
I chungchang thu ka ngaihtuah châng chuan, Pathian hian Pu Duhoma hi Zoram politik kalh kimtu pakhat lekah a ruat reng mai dâwn a nih awm hi a ka ti thin. Assembly House lama Zoram mipui tâna i auhla kan ngaihthlâkte hian, mimal ang chuan Zoram mipuite hian kan duh ber fo che a. I tawnhriat, i hriatna thûk takte hi a taka Zoram tâna i hman theih hun nghakhlel hle thin mah ila, i kuta sawrkarna pe tur êm che chuan kan ring zo lo leh tthin che a nih kha!
Heti taka mi beidawng duh lo, mi tumruh leh rilru hnual duh lo na nâ nâ chu, a tawp a tawpah chuan i duhthusam chu pêkin i awm dâwn ta a nih hi. Ka lawmpui êm êm che a. Nangmahah hian Zoram mipuite chuan beiseina kan nei sâng kher mai! Eirûkna kawnga fihlimah kan ngai che a, chutih rualin party chhûngkaw induhsakna hleihluak tak angte kha, i rorêlna hnuaiah chuan hmu lo ngei turah kan inngai a ni.
Tunah chuan thu maia i sawi thin, kan ram leh hnamin hma a sawn theihna tura ruahmanna i lo neih ang zawng zawngte kha, a taka tihlawhtling thei turin i kutah thuneihna a lo awm dâwn ta a. Zoram Politik boruak bawlhhlawh leh tawp lutuk pawh i rorêlna hnuaiah chuan thenfai a nih ngei kan ring tlat a ni.
Pathianin i hriselna vawn thatsak tlat che se la, finna leh remhriatnain thuam deuh deuh che rawh se. A taka Pathian tihna nen ram rawng i bawl a, Pathian hre reng chunga a duh dan anga ram i hruai theihna turin, duhsakna sâng ber hlan mawlh mawlh chung chein, hnehna i lo chan tak avangin lawmpuina chibai ka bûk mawlh mawlh che a ni e.
Hetia Pu Duhoma kan lawmpui mêk lai hian, fak hlawh lo leh a hming lam rik khât tak a nupui chanchin hi kan sawi lo ang maw? Khatia IPS nupui meuh ni a, vai ramah pawh mite zah kai leh duh apiang nei ve thei kha, a pasal thutlukna avangin kut bêngin Zoramah a lo haw ta a.
Chutah, kum 39 chhûng zet a pasal hlawhtlin ni hmêl reng hmuih tur awm si lovin, rinawm tak leh chhel takin a pasal hnungzuiin a thlawp tlat a. A phunnawi thawm emaw, a lungawi loh thu a sawi chhuah emaw kan hre ngai lo.
Rinawm leh chhel takin a pasal tawrhna tawmpuiin, a pasal an sel luai luai lai leh an nuihzat mawlh mawlh lai pawhin nupui tha nih a bâng hauh lo. Chuvangin, a tawpah chuan Mizoram First Lady a rawn ni tur hi ka lawmpui êm êm a.
First Lady nih pawh a tlin ngei ka ring tlat a ni. Zoram hmeichhia tawh phawtte entawntlâk nu ropui a lo nih ngei theih nân, a pasal fin chhuahtu leh venghim tlattu, eirûkna leh hlemhletna laka a pasal humhim a, duhamna leh thluaka sum lut natna a pasalin a vei loh nana thahrui chak a lo nih ngei theih nân, Pathianin chakna leh finnain thuam mawlh rawh se.