Pu Lalduhoma tluka midang bei nasa an awm lo – Zodintluanga

Chief minister ni lai Pu Lalduhoma chu beih hlawh anga sawi ni mah se, a ni tluka midang bei nasa an awm lo tih Congress hruaitu Zodintluanga chuan a sawi.
Kar kaltaa Champhaia hun an hmanaah MPCC adviser Zodintluanga chuan, kum 2021-a Serchhip by election-ah khan, tuna chief minister hian pawisa engmah a neih loh thu leh by election chu a tan a huphurhawm lutuk a, general election-a a leiba pawhka la rul zo lo, tia a sawi laiin, heti khawpa pawisa nei loa insawi hi chief minister atana lakluh a nih hma hauhin a chenna tur in sakna turin tlang a rawt nghal thei tih a sawi.
ZPM party-in Pu Lalduhoma chu midangin an bei nasa nia inngaih laiin, Pu Lalduhoma tluka midang bei nasa, mi zawng zawng beitu an awm lo tih a sawi. “Pu Zoramthanga phei chu ‘not normal’ a ti duh a, Pu Lal Thanhawla pawh Central Jail-ah chaw an chhum kep mek, tiduhtu a ni. Khatianga midang tithintu khan amah mipuiin an vuak letna tuar thiam loin a inhrosa mai mai a ni,” a ti.
Lengpui ram hralh chungchangah file pangngaia a kal chuan MNF sawrkar hotute kha mantang eitu tur an ni a. Chief minister Lalduhoma’n hei hi a tha lo, tiin, ‘kept in abeyance’ tiin MNF sawrkar laia file kal, mantang eitute pawh an tih fel vek kha a titawp a. ZPM sawrkar tharah inbiakna kalpui that leh niin, an duh ang tawka an indawr hnuah mantang eitu thar list ti felin a chak thei ang berin file an kaltir leh tihna a ni tih Zodintluanga hian a sawi. “Indian Air Force hian airport bul ram hi an lei loh an hlau lutuk a, chuvangin Lengpui Airport pawh IAF an lo zawrh a, chuta tanga sum an hmuh tam theih tur zia uar takin an sawi thin,” a ti.