F. Lalremsiama
Mb: 8415994340
|hangthar zelah a hming leh a chanchin sawi tawp Ni a awm lo ang. Larkhel nan ka thianpa ka ti ve ngawt lo. Ngai mah teh: Govt. Mizo High School – ah Pawl 7 atanga Pawl 10 (Matric) pass thlenga kaiho kan ni. Ani Sailo Lal fapa Matric chung lamah bahlah loin a kal tluang a, kei 1963 – ka Graduate ve meuh kha chuan College-a Zirtirtu a lo ni hman tawh. A nupui Pi Lalhrimi pawh Sailo Lal fanu a ni a, Kei hnuvai rama Kawl-ek-thai ve khan BA (Third Year leh Fouth Year) Pachhunga College -ah ka zirpui ve hmana kan BA rual ta. Aizawl – Chaltlangah kan inthenawm zui leh ta zel bawk a. Kan thian in-pawl khat ho Re-Union pawh 2012 khan kan hmang ho leh a, kan tlem sawt ta hle!!
Mite sawi tam loh thu kilkhawr ka sawi duh a ni. Mak ka ti thin. A tumruhzia Saptawngin will – power, determination, perseverance, resilience leh devotion zawng zawngin a fun kim sen loh amahah hian a infawk khawm! Han inkawm hian rilru han sawi ila. “Aw” a ti thei zel mai. A hetih vang hian Thusawi thiam lo ve tak si hi Mizo Academy of Letters (MAL) President-ah |hangkhat – liam zan (kum 25 chuang zet) a ni thei. America President chu kum 4 Term vawi 2 bak an ni thei lo. Amah anga kan High School Pawl-pui, Pu K. Malsawma pawh Mizoram Upa Pawl President a ni zawn tluk tluk a. Dan siam that phah hial ngai khawpa Hotu – luber Term bituk siam ngai zuk nia le! High School kal lai kha chuan Average chunga leng hret chauh an ni. Fala tiin ka sawi mai zel tawh ang. A ze dang mak bik tlemte chauh sawi ila.
Taksaa a tuarchhelzia leh a fei em emzia hi sawi hmaih chi a ni lo. Thi mai thei dinhmunah thla 6 vel zet a awm. 2024 December thla chawhnu lama Durtlang Hospital-a a awm lai khan, ka duhsakna leh ka tawngtaisak dan chu Dama lo chhuaka an in lum ngeia Mas leh Kumthar hmang turin a ni chauh! A faten a khua a har, be rawh, an ti a; ka phone-in chutiang chuan ka sawi, a dan pangngaiin min bia. Biak rei chi a ni lo tih ka hria. Ina an inenkawl hnu khan vawi hnih aia tlem lo kan inbia, a ngai reng.
Zirna leh thiamna leh Leadership a insiamsak chhoh zel dante hi asin mak ka tih chu. Heta chhuanawm ka tih chu Pawl 10 kan nih lai vel khan SANGI INLENG hi a drama ang chiah lo hian MZP Magazine-ah a tichhuakin ka hria, Asst. Editor ka ni a, Editor Pu KL Hnuna (RIP) a ni. Kei pawhin “Huan rama Kel lut” pawi a sawi lo e ka lo ti tawh. Khang hun lai atang khan thlir teh Calcutta College tha ber St. Xavier’s atang daiha Graduate, Lawn sang ta tual tual, Fala kha ka chhuang chho ve zel!!
Padma Shree te hi a phu hliah hliah. Natak Akademi Award a dawn a lawm ni khan Pu Laltluangliana Khiangte chuan Fala te chhungkuaah chuan MA Degree nei 6 an cheng ho a ti daih tawh. Anmahni nupa, an fapa 2 te nupa = 6, tunah phei chuan Ph.D pahnih monu an nei hial tawh. Ngaihnep vang ni miah loin, Award tumtlang, hraw pui pui a dawn zozai te hi – keini a Pakhat te chauh pawh dawng ve lo chuan a ropuizia leh a chhuanawmzia kan hrechiang khawp mai.
Nun tam nei an ni. Champhai College khi a hoa din a ni a, Principal hmasa ber a ni. Aizawl-a NEHU Campus-ah khan Deputy Registrar-in a awm reng tawh. Zingkara kea kal taima a nia, ama ho hian K. Malsawma te, Vanlalduha Sailo te, HD Pachhunga te a huhoin an kal dial dial thin kha mitthlaah a cham reng: Hmanlai a ni der ta!
Kohhranah mak takin Pathian awm ring lo anga sawi deuh tawh kha tih danglam a ni a. Rei tak Tual Upa niin rawng a bawl ta a. A fanu pasal Rev. Lalhleia pawh kan Synod hnuaia Family Guidance and Counselling Course zirchhuak hmasa ber niin ka hria. Hmun hrang hrangah rawng an bawl mek zel.
Taksa, Rilru, Thlarau Nun kawng kan zawh ho dante pawh hi, “Ka thianpa” ka ti mek mek bawk a, tawite sawi ve thain ka hria. Delhi-a kan awm lai khan zu in-ngai-tawh-lo chu Dr. Nghakliana te, Pu Lalchuangliana teho khan kan phak ve tawk tein Delhi Mizo Inkhawm (DMI)-ah khan min kaihruaia, Committee Member-ah khan kan awm ve chhung zawng khan thlan ni vein, Chaltlang Kohhranah Sande Sikul Zirtirtu leh Thuhriltu-ah Fala te nen kan thawk a. Chaltlang South Kohhrana kan awm hnuin Upa ang hialin Pathianni Zan Thuhriltu te kan ni hoa, taksa awng rawp vangin kan chawl tawh ve ve a ni. Duhsakna kan dawng tlang tam khawp mai. Fala nupui Pi Hrimi phei chu Bial Kohhran Hmeichhe Hruaitu a la ni zel theiin ka hria. Ropuina ramah Fala chu thlamuangin chawl rawh se.