Pu Tawna nen tel kan tum tawh lo – Zoramthanga

Mizo National Front party kaihhruai hna chu senior vice president Tawnluia leh amah tel loin kal tawh se, tiin thutlukna an siam tawh tih president ni lai Zoramthanga chuan a sawi.
Thawhtania MNF office – Mizo Hnam Run hawnnaah Zoramthanga chuan Pu Tawnluia nen an sawi dun a, kum 80 chunglam ve ve an lo ni tawh a, an ni tel loin party kal tawh se an ti tih a sawi. “Kan party tan hian theihtawp kan chhuah zel dawn a, hotute pawh kan hrilh tawh a, hotuten remruatna an la rawn nei mai ang,” a ti. MNF hruaitute ni lai term a tawp tawh a, hotute hnenah an ni (Pu Tawnluia nen) chu ngaihtuah tel tawh lo turin an chah tih a sawi.
MNF lungphum chu ‘Pathian leh kan ram tan’ tih a nih thu leh he thuthlungin a man a pek tawh hi a tam em em tawh thu MNF president hian sawiin, “Khawkhawm, hmeithai, fahrah leh martar thisen tam tak a luang a. Party tam tak a lo dingchhuak tawh a, an ral leh thin. MNF erawh kum 63 chhung Pathianin a hruai tawh a. Kum 63 chuang Pathian leh kan ram tana kal tawh kan nih hi inthlan vawi khat vang maiin kan nghing tur a ni lo,” a ti.