Puantahtuten tangkai zawka GI puan an hman dan tur zir

Puantahtuten tangkai zawka
GI puan an hman dan tur zir
Commerce & Industries department leh National Handloom Development Corporation Ltd. tangdun chuan Geographical Indication (GI) authorised user workshop chu Mizoram puantahtute tan Aizawl, Zuangtui, Sailam, Kanghmun ‘S’ leh Thenzawla a buatsaih mekah Zirtawpni khan programme tawp ber atan Handloom Complex Thenzawlah hun a hman a ni.
Hmanpuitu NHDC Ltd. managing director Commodore Rajiv Ashok (Rtd), Noida chuan GI puan leh a tahtuten hlutna tam zawk an neih theihnan hma lak zel an tum tih a sawi. Weavers’ Service Centre Aizawl asst. director Utpal Ch Baro chuan a hmanpui bawk.
Tuna GI puan Mizoram-in a neih mek 5 – Puanchei, Tawlhloh, Hmar-am, Ngotekherh leh Pawndum hman tangkai dan leh eizawnna atana hman a nih theihna atan inzirtir a ni a, subject specialist Tejas chuan zirtirin zawhna awmte chhan a ni. Thenzawla puantahtu 150 vel an tel.