Public sector capacity tihchak

James Miahlung

Tunhnaia Indian Express-in sawrkar laipui Ministry of Housing & Urban Affairs (MHUA) data behchhana Smart City Mission (SCM) project zawh chak dan a zirchianna a tarlan danin smart city atana thlanchhuah khawpuite zingah Surat, Agra, Ahmedabad, Varanasi leh Bhopal te chu project zo chak ber top 5 ah awm in, northeast-a khawpui paruk leh UT atangin Lakshadweep, Puduchery leh Andaman & Nicobar Island te chu project zo har ber an ni.
Public policy lam hawi zirchikna (Analysis) tichhuak thin online portal Indiaspend.com in March, 2023 a MHUA data a zirchiannaah 2015 leh 2022 inkarah state hrang hrangin SCM project sum an hmuh an hman chak dan a inang lo hlawm hle. Sawrkar laipuiin cheng vaibelchhia 37,410.43 a pek chhuah atangin state ten cheng vaibelchhia 33,074.4(88.4%) hmang tawh in, Jharkhand(98.72%), Rajasthan(94.97%), Karnataka(93.73%), Tamil Nadu(92.90%), Gujarat(92.87%) leh Haryana(92.59%)te sum hman chak dan (Utilization rate)san lamah top 5 ah an awm a. North East(NE) state pariatte zingah Sikkim (92.19%)leh Manipur(80.00%)tih loh state dangte utilization rate chu 80% aia hniam vek a ni.
SCM project zawh hmah kawnga northeast, UT leh India ram khawpui te(Small city)te an hnufum chhanah official lamin an pumawh ber chu theihna(Capacity) hniam a ni. Smart city kaihhnawih project hrang hrang kalpui tura din Special Purpose vehicle leh tualchhung sawrkar(Eg. Municipal corporation) ten technical/managerial capacity an tlachham nia sawi a ni a. Capacity hniam chhan pakhat chu smart city buaipuitu technical team zingah urban management leh project management lam hawi thiamna sang zawk nei an tam tawk loh hi niin a lang.
Sawrkar(Public sector)kalphungah thawktute intuai hriamna leh an thiamna tihpun(Capacity building)hian ngaihsak a hlawh tawk thin lo a. Tunhnaiah capacity building hian ngaihven hlawh thar in, sawrkar laipui hnuaia thawkte tan khawvel huapa capacity building programme huam zau ber tura ngaih “Mission Karmayogi” chu 2020 atangin kalpui tan a ni. Cheng vaibelchhe 510.86 senna tur he programme hnuaiah hian kum 5 chhung(2020-21 atanga 2024-25 thleng)atan central sawrkar hnuaia thawk mi nuai 46 bawr vel tuam tura ruahman a ni.
Mizoram State Training Policy (MSTP), 2013 chuan sawrkar hnathawkten an post chelh tur in theihna (Competence) a mamawh ang an nei theihna tura training an dawn theihna nan, competency framework a rawn ngaipawimawh a. Middle level(Under Secretary/Deputy Secretary) leh management level (Joint secretary atanga a chung lam) tan project management, leadership, strategic planning, policy analysis, policy duan leh project monitoring ah te training an dawn a, subject hrang hrangah theihna sang zawk an nei theih nan India ram chhung leh ram pawn thlenga training an nei hi MSTP, 2013 ngaihpawimawh pakhat a ni.
Sawrkar laipui programme pangngai bakah ram pawn global financial institution (ADB, World Bank, etc.) te sum puk behchhana rawn kal, externally aided project-te a hunah tha taka zawh an nih theih nan public sector capacity building lamah tanlak nasat a tul dawn niin a lang. Tun dinhmunah sawrkar laipui leh state sawrkarten department/ministry chhungah theihna(In house capacity)an tlakchham avangin pawn lam consultant leh consultancy firm ah innghahna a sang hle. Indian Express in RTI kaltlanga a zawhna central ministry ten an chhanna atanga a lan danin 2017 leh 2022 inkarah ministry 16 te chuan international consulting firms lar panga- Price Waterhouse Coopers (PWC), Ernst & Young Global Limited, KMPG international limited, Deloitte Touche Tohmatsu Limited leh Mckinsey & Company-te rawih nan cheng vaibelchhia 500 dawn lai an seng a. Public sector capacity hi chak se tun ang emin consultancy firms te rawih nan sum sen a tul lo theih nia ngaih a ni.
Public policy duan leh tihpuitlin kawngah chona a nasa chho zel dawn a, hemi hmachhawn theih tur hian department hrang hrangin pawn lam mithiamte kutah chauh innghat lova in house capacity an tihchak ve a tul a. Administration ngawr ngawr piah lamah a hotu sang lamin area/subject hrang hrangah short term/long term training kaltlangin thiamna ril zawk an nei theihna tura hmalak hi tihmakmawh a ni. Entirnan, urban development leh smart city buaipuitute zingah civil service leh technical department atangin official tha tak tak awm mah se managerial/management level ah specialised subject hrang hrang- urban management, data analysis, urban planning, infrastructure management, finance, water technology, transport planning leh a dangah thiamna nei awm tam theih se tun aiin urban governance ah hmasawnna a awm a rinawm. Ram chhung hmun dangah specialised subject hrang hrang zirna in a awm nual a, hengah te hian MSTP, 2013 duh dan angin tun aiin sawrkar hnathawk intir uar ila, department te in house capacity a san phah ngei ang.
Zirbingna(Research)lama tanlak hi public sector capacity tihchakna atan thil pawimawh tak pakhat a ni ve. Department hrang hrangte hian programme tihpuitlin nan tha leh zung tam tak an seng a, zirbingna lam ngaihsak hman a ni lo. Central ministry hrang hrangin anmahni pualin in house capacity tihchak nan research institute/centre an nei nual a, state sawrkarte entawn atan a tha hle. Entirnan, health ministry hnuaia National Health Resource System Centre te, MHUA hnuaia National Institute of Urban Affairs leh a dangte zulzui in state in mahni pualin policy leh technical assistance pe theih tur research centre nei ve ta ila national level bakah state level-ah huam zau zawkin zirbingna a awm theih ang a, programme duan leh tihpuitlin kawngah nasa takin hma kan sawn phah ngeiin a rinawm.
Public sector capacity tichak tur leh pawn lam consultant/consulting firm/institute-te rawih na na sum tam tak kal thin titlem turin training leh zirbingna lamah tun aia nasa zawka tanlak a ngai dawn a. Sawrkar laipui in zirchianna data behchhana policy duan(Evidence based policy making)a rawn uar chho tak zel avangin state sawrkarte pawhin zirbingna lam an ngaihsak deuh deuh a tul a,heti lam atan hian sum tam zawk sen an inhuam a ngai a ni.
(Thu ziah hi mimal ngaihdan a ni)