PUBLIC TRANSPORT REGULATION LEH THUNEIHNA SEMZAI
James Miahlung
Tunhmain MST bus leh private bus-te chu thingtlang leh khawpui inkara zin veivahna atan hman uar ber ni thin mah se, tunah chuan Maxi cab(Sumo)hi district leh district inkara public transport hman nasat ber a rawn ni chho ta a; Maxi cab-te hian bus an luahlan ta hial zawk a ni. Transport department chhinchhiah danin ni 31, October 2023 thleng khan Mizoramah Bus 578, Maxi cab(Sumo) 2,396, Motor cab(Taxi)5847 leh Three-Wheeler (Passenger) 5,911 service lai an awm mek a. Heng public service vehicle zingah hian auto rikshaw/three wheeler(passenger)a thang nasa ber a, ni 31 March 2019 leh 31 october 2023 inkarah three wheeler(passenger) hi 58.17% laiin a pung hman a ni.
Sawrkarin mipui mamawh(Public service) zawng zawng pe chhuak thei lo mah se, service pe chhuaktuten service tha tak an pekchhuah theih nan inkhuahkhirhna dan leh dun(Regulation) siam in, dan zawm loh emaw service tehfung(standard) pha lote chungah hremna a lekkawh theih a. Ram changkang apiangah public transport regulation a chak a, service standard mumal tak duan a nih avangin mipuiin public transport tha leh rintlak an dawn theih phah thin.
Mizoram transport system-ah hmasawnna hmuh tur tam tak a awm rualin hmasawn belh theihna tur pakhat chu public transport regulation hi a ni. Tun dinhmunah permit a felfai a dan bawhchhiatna lian tham a awm a nih lem loh chuan thuneitute atangin a hranpaa vil zui a awm lutuk lova, policy duangtute pawhin thil dang buaipui tur a tam avangin heti lam hi an ngaihven hman lutuk lo a ni mai thei. Kumin MLA inthlana political party-te manifesto-ah pawh lirthei dinkhawmna (Stand/Terminal)sak, vehicle replacement leh chhiah lak dan chungchang tih lo a bak thil dang public transport chungchangah sawilan a awm meuh lo.
Kum 2017 khan Siaha District Transport Office hmalaknain Maxi cab-a zin thinten zinkawnga an harsatna tawh leh rawtna an nei te hriat tumin “Maxi Cab Travel Survey” nei a ni a, survey zawhna chhangtu zingah a tam zawkin tlan chak chungchang, ruihtheih thil, zuk leh hmuam leh a huna chet (Punctuality) chungchangah te duhkhawp lo lai an ngah hle. Survey atanga thil chiang tak rawn lang chu Maxi cab service him leh rintlak pe an awm laiin passenger-te himna leh remchanna ngaipawimawh lem lo driver an awm ve a, hei hian regulation tihchak a tul zia a tilang.
Thuneitute atanga regulation mumal leh service standard zawm tur duan a nih loh chuan service leitu passenger ten service tha leh rintlak an dawng lo theih a, mipuiin an dikna chanvo an hmuh theihna turin sawrkar a inrawlh a tul thin. A nihna takah chuan public transport service vehicle hrang hrang-Bus, Maxi cab, Taxi leh adt neitute hian sawrkar atanga permit an hmuh hmangin sawrkarin service a pek tur ai an lo pek sak a ni zawk a ni. Entirnan, passenger te himna nena inkungkaih tlat chu lirthei khalhtute hnathawh hun rei zawng(working hours) hi a ni. Bus leh Sumo driver te an rim lutuk chuan mut kham loh chau lutuk avangin chetsualna thleng theih reng a ni. Hengah hian passenger leh driver te him nan sawrkarin regulation mumal tak a duang theih. Dan hman lai Motor Vehicles Act, 1989(MV Act) leh Mizoram Motor Vehicle Rules, 1995 ah lirthei nawlpui khuahkhirhna tur awm mahse public transport regulation lam a hranpaa thlurbing a nih loh avangin dan thar duan hi duhthusam a ni. Tin, khawpui leh thingtlanga dinhmun a inan loh avangin Aizawl bik tan tuna thuneitu sang State Transport Authority(STA)in duhthu a sam lo a nih chuan state thenkhatin an khawpui pual bik tan urban transport authority hran an nei angin Aizawl Urban Transport Authority te pawh din mai nih se public transport inrelbawlnaah hmasawnna tam tak a thlen a rinawm.
Regulation chungchanga harsatna awm thin chu lirthei neitu, hmun hrang hranga awmten service tlem te te an pe chhuak hi a ni. District hrang hrangah mi pakhatin maxi cab/Auto rikshaw pahnih khat lek te an enkawl a, thenkhatin sumo counter nghaktute kutah engkim an dah avangin thuneitu atangin in vilzui a buaithlak fo. Hetiang ang harsatna hi ram changkang zawkte pawhin tawng ve in, a chinfel dan kawng an lo dap tawh thin a. Public transport system thatna ram Singapore-ah tunhmain operator hrang hrangin Bus an tlantir chuan harsatna a thlen avangin, regulation a awlsam zawk nan kum 1973-ah sawrkarin heng operator te hi Singapore Bus Service tih hming vuahin operator pakhatah a chhungkhawm vek a, a hma zawng aiin regulation a mumal phah a, mipuiin service tha zawk an dawn theih phah a ni.
Public transport mamawhna a sang zel dawn a, nakinah chuan ram danga an tih ang hi Mizoramah tih ve a tul hun a awm ve ang. Tun anga mi pakhatin sumo pahnih khat lek an tlantir ai chuan mi pakhatin a tlem berah sumo 5 atanga 10 tal tlantir ta se, regulation-ah nasa takin awlsamna a thlen ang. Sumo ang thoin Aizawl city bus neitu mi chi hrang hrang an awm na chungin bus owners association-ah inchhungkhawm in, member-te zawm tur dan leh dun mumal tak an nei a, taxi leh maxi cab te aiin an felfai deuh zawk niin a lang.
Public transport regulation nena kal kawp tlat chu thuneihna semzai chungchang hi a ni. Tunah hian public service lirthei kaihhnawih chi hrang hrang-permit pek, permit tihnun leh a dangahte thuneihna engkim STA kutah awm in, district lamah tihfel theih a tam lutuk lo. Chuan man(Fare) bihthliah kawngah pawh district lamin STA ah rawtna an thlen theih chauh a ni. State dangah chuan fare bithliah leh thil dang tam tak district/RTA level-ah chinfel theih niin, hei hian lirtheia eizawngte tan awlsamna a siam bakah regulation thlengin a awlsam phah thin.
Ni 26 November, 2019 khan Lungleia NGO leh public transport vehicle owners association hruaitute chuan joint resolution siamin, chhim lama lirtheia eizawngten lirthei kaihhnawih chingfel tura Aizawl pan ngai thin avanga an harsatna tawh hrang hrang suktian nan leh public transport regulation a lo chak zawk theih nan Sec, 68, MV Act, 1988 in a phal angin chhim lam district pali- Lunglei, Siaha, Lawngtlai leh Hnahthial-tan RTA dinsak turin sawrkar an lo ngen tawh a. Vice Chairman, High Powered Committee Lunglei leh Lunglei DC te pawhin sawrkarah ziakin RTA chungchangah ngenna an lo thlen ve tawh bawk. Chhim lam atanga nawrna a rawn awm hnuin STA atangin district lama thuneihna thenkhat semzai(Delegate) nia hriat a ni. RTA chungchang bikah erawh chuan STA hian state dangte ngaihtuahin Mizoramah lirthei a la tam lutuk lova district ah thuneihna tam zawk pek a nih chuan chuan hmansual palh theih nia ngaiin RTA din hi tul a ti rih lo nia hriat a ni.
Ram changkang zawkah chuan public transport authority thutlukna siamin mi tin a nghawng avangin a member atan Economics lama thiamna nei te, consumer union aiawhte, transport service provider aiawh te, media leh hnathawktu inzawmkhawm(labour union)aiawh te thlengin telh an ni thin a. Singapore-ah phei chuan fare bithliah leh kenkawh an duhtui avangin fare chungchang bik ngaihtuahtu tur mithiam leh sector hrang hrang atanga aiawh telna Public Transport Council(PTC) din a ni hial a ni. Tun aia chak zawka regulation kalpui a nih theih nan leh fare bithliah dan kalphung te a lo changtlun zawk theih nan STA member ruat dan ennawn a hun hle. Tuna official member pahnih leh pawn lam mi pathum chauh ni lo hian member tam zawk inruat ni se transport inrelbawlnaah rahbi thar kan kai ngei ang.
Ram economy thangchho zelah khawsak dinhmun lo sangin mimal lirthei nasa takin pung mah se, thingtlanga chengte leh khawpuia mi harsa zawkten an hman uar ber chu public transport tho a nih avangin service pe chhuaktuten anmahnia inkaihruaihna dan leh dun an nei sa piah lamah sawrkar atangin regulation mumal tak a awm a tul a, transport policy duangtuten public transport regulation a lo chak zawk theih nan ngaihtuahna zau zawk seng theih se a duhawm hle.
(Thu ziah hi mimal ngaihdan a ni)