Publicity-ah tan la turin PWD chah

Publicity-ah tan la turin PWD chah
Public Works Department (PWD) hnuaia hna hrang hrang thlirletin Zirtawpni khan an minister Vanlalhlana hoin an thukhawm a. Minister pui tura ruat, adviser to chief minister (Technical) Ginzalala leh MLA T Lalhlimpuia ten an tawiawm.
Minister chuan mipuiin PWD hnathawh an hriat theihnan publicity-ah tan lak lehzual a ngai tih a sawi a. Sawrkar hnathawh chu rawngbawlna a ni a, mipuiin hamthatna an dawn theihnan dik taka hna thawh chu an tih makmawh a ni tih a sawi. An dinhmun a te emaw a lian emaw, an hna chu rawngbawlnaah ngai a, hmun nuam emaw hmun hrehawmah pawh phur taka an mawhphurhna hlen chhuak zel turin a fuih a. An kawng siam a tlo theih zawknan a enkawl dan mipui leh tlawmngai pawl zirtir that a pawimawh tih a sawi bawk.
Adviser to CM Ginzalala chuan, sawrkar hnathawkte file tikalmuangtu leh tithuanawp theitu an nih avangin tun aia tan lehzual a tul, tiin, mipui tana dawr nuam zawk an nih a ngai tih a sawi a. Engineer-te chu technical lamah pawh intahhriam a pawimawh tih a sawi a ni.
Hun hmandik chu hmasawnna atana thil pawimawh a nih avangin tun aia hun hmandik kawngah tan lak a ngai tih a sawi a. Ram changkang kan nih theihnan hmasawnna ruhrel hrang hrang din a ngai a, ramngaw leh nungchate humhalh chungin heng hmasawnna hna hi kalpui zel tur a ni tih a sawi.
MLA T Lalhlimpuia chuan kumtin fur laia leimin avanga harsatna thleng thin tihziaawmna atan hmalak dan tur ngaihtuah lawk thin a pawimawh tih a sawi a. Engineer-te chu department hmel lanna an nih avangin, sik leh sa leh fur leh thal atan tih tur hmasa leh hnunung hriat a, hna pawimawh zualte thliar thiam a, inrelbawlna tha neih a tul tih a sawi a ni.