Pachhunga University College chuan kumin under graduates exam-a an zirlai zinga titha leh gold medalist ho an chawimawi a. Student of the Year an puan bakah lur tharte lawmna hman a ni bawk.
Hmanpuitu Higher & Technical Education minister Dr Vanlalthlana chuan PU College-ah zirtirtu tha tak takte kaihhruaina hnuaiah zirna bakah mimal nun thlenga hmasawnna chhar thar tur a tam tih a sawi a. Zirlaite chu khawvel hmasawn dan ang zela intuaihriam reng turin a chah. Company lian leh ropui tak tak – Nokia, Kodak, Blockbuster adt. pawh khawvel hmasawnna in a kentel anga an in update duh loh avangin an tlachhia a, hetiang chiah hian khawvel hmasawnna mil zelin a tha lama in update a tul tih a sawi a ni.
Mizoram University undergraduate exam 2024-a department tina top 10 chin chu chawimawina certificate leh sumfai hlan an ni a. Stream hrang hranga titha berte hnenah ‘Proficiency Award’ hlan a ni.
Kum 2023- 2024 chhunga PUC zirlai tha ber, Student of the Year atan Lalnunpuii Hlawndo, Department of Economics thlan a ni a. Student of the Year atan hian academic record bakah college activity hrang hranga zirlaite chetthat dan tehfunga hman a ni.
Kumin hian PUC atangin UG stream hrang hrangah mi 960-in final semester examination an hmachhawn a, chu’ng zinga zirlai 830 chuan pass in, pass percentage hi 86.46 a ni. Arts subject hrang hrang atangin top 10 rank nei mi 67 an awm a; science stream-ah 68; commerce atangin mi 5 leh management atangin mi 10 an awm a ni. MZU under graduate exam-2024 ah hian PUC atangin rank nei 150 an ni. MZU hnuai rank holder awm zawng zawng 227 atangin PUC atanga rank holder hi zaa 66 an ni pha a ni.
PU College-ah hian tunah UG course 23 leh PG course 5 zir theih a ni a; zirlai hi UG ah 2600 chuang an ni tawh. Zirlai lut thar turte tan Pachhunga University College Entrance Test (PUCET) leh Common University Entrance Test (CUET) hmangin admission tih a ni a. Zirlai lut thar 725 awm tawhin, CUET hmanga lut turte tan admission la tih mek zel a ni.
Nilainia an hun hmannaah hian MLA JeJe Lalpekhlua chu khualzahawm a ni.
-- Advertisement --
8 Lenrual Hlui Award (Science topper) – Lalhriatzuala, Chemistry subject.
8 HK Bawichhuaka Award (Arts topper) – Lalhlimpuii, Economics subject.
8 Khawtinkhuma Award (Commerce topper) – David R Lalhumhima, Commerce subject.
8 Dr H Lallungmuana Award (Management topper) – Dolly Malsawmtluangi, Management subject.