PUC khawchuam Sailam

PUC khawchuam Sailam
Pachhunga University College (PUC) chuan thingtlang khawchuam (adopt) an neih thin atan Sailam an thlang a. Ningani khan a hawn niin, Higher & Technical Education minister Dr Vanlalthlana’n a hmanpui.
PUC hian kum 2024- 2026 chhungin Sailam khua hi khalhin, college department hrang hrangin an zirchiang anga, kawng hrang hrangin an pui dawn a ni.
Kum 2012 atang khan PUC hian khawchuam (adopted village) a kalpui a, hemi atan hian zirtirtuten sum thawhkhawmin chumi hmang chuan kawng hrang hranga an zirchian bakah a khawmite an tanpui thin. Lehkhathiam thei deuh tana PUC-a zir zawm dan an ruahman bakah zirlai leh upa lam tan Aizawla zirna kaihhnawih hmun pawimawh tlawh leh thildang an ruahman sak thin bawk.
Sailam khua hi Aibawk RD Block, Aizawl district-a awm niin chhungkaw 179 an awm mek. Mizo lal hmingthang Bengkhuaia khua thin a nih bakah a khawmite hian sava humhalha bird sanctuary an siam avangin hriat leh ngaihhlut a hlawh hle. PUC adopted village pangana a ni a, a hmain Phulpui, Lungleng I, Dulte leh Khawrihnim chu PUC hian a lo adopt tawh a ni.