Puihna semnaa Israel chetnaah Palestinian 27 thi leh

Puihna semnaa Israel chetnaah Palestinian 27 thi leh
Gaza-a puihna thil sem chhuahna hmuna a dawng tura pungkhawmte Israeli-ten an kahnaah Palestinian 27 vel an thi niin tual chhung thuneituten an sawi.
Civil mite hi al-Alam leh a chhehvel, puihna sem chhuahna hmun atanga km khat chuang awrha hlaah tank, quadcopter drone leh helicopter hmanga kah an nih thu Gaza-a Hamas hnuaia Civil Defence agency thupuangtu, Mahmoud Basal-a chuan a sawi.
Israel Defense Forces (IDF)-te chuan sipaite hian mi rinhlelhawm, ‘kalna tur bik kawng an ruahman atanga penga anmahni lam pante’ an kap niin an sawi thung.
Pathianni khan Hamas hnuaia health ministry chuan puihna sem chhuahna hmunah tho mi 31 kah hlum niin mi 200 dawn an hliam niin an sawi tawh a, Israel chuan a pha nasa hle.
Thawhlehnia tuka thil a thlen leh hnuah hian Khan Younis-a Nasser Hospital Director Atef Al-Hout chuan ruang 24 leh hliam mi 37, silaimuin a fuh an dawn thu a sawi a, hengte hi Israeli sipaiten ‘civil mi pungkhawm, Rafah khawthlang lama puihna dawn tum’ niin a sawi bawk.
Ram dang mi, heng lai hmuna damdawi thiam tawk chuan zing dar 03:48 atangin an buai tan a, a hnuah phei chuan thi leh hliamin a bawh buai zui niin a sawi.
Tual chhung chanchinbumi, Nadeem Zarab-a’n video a dah chhuahah chuan a patea nen thil semna hmun hi zing dar 02:00-ah an thleng a. An thlen hnu rei lo teah ‘silai a puak a, helicopter, tank leh ralsai mite kah’ niin a sawi.
“Hmun tin atangin silaimu a lo kal a, bang chu inphen nan kan hmang a ni,” a ti.
IDF-in thuchhuah an siamah chuan an sipaite hian ‘Gazan civil mite hi puihna semna hmun an thleng tur dan a ni lo’ niin an tar lang.
“Tihthaihna atan sem chhuahna hmun atanga km chanve velah silai hmeh puah a ni a, mi thenkhat sipaite lam panin an kal a, sipaite tan pawha hlauhawm thei an ni,” an ti.
Israel hian ram dang mi chanchinbumite chu Gaza-a an luh a phal lo va, finfiahna chiang tak a awm thei lo.
Gaza-ah hian Israel leh US rawtna angin tanpuina sem hna hi Gaza Humanitarian Foundation (GHF)-in a kengkawh a, hei hi UN agency leh pawl dang buaipui thintute thlakna atan a ni.
GHF system-ah hian civil mite hi Israeli sipaite thununna lai hmuna puihna sem chhuahna hmun siamah an kal a ngai a, hetah hian ralthuam keng American security contractor-ten hna an thawk.
Palestinian-te hi an thil dawn la tur hian thui tak tak an kal a ngai a, kg 20 vela rit theuh an keng haw thin.
UN-in a sem kha chuan hmun 400-ah semna siamin mipuiin an mamawh tawk zelin, mi tinin ei tur an hmuh theih nan an sem thin thung.
System tharah hian a kal hmasa pek hmasak an nih avangin a tuka sem dawng turin zan atangin an intlar tawh thin a. Hei hi UN leh puitu pawl dangten an sawisel a, mihring inenkawl dan kalhmang a ni lo tih an sawi.
Tar lan tawh thin angin Gaza-a Hamas-ten Israel ram lutin October 7, 2023 khan mi 1,200 chuang an thah bakah hren turin mi 251 an hruai a, hemi chhang let nan hian Israel hian a rûn zui.
Gaza-ah hian mi 54,470 vel an thi tawh niin Hamas health ministry chuan a sawi.