Punching bag hnek rei record
Punching bag hi chawl lovin engtia rei nge i hnek peiha i rin? I peih rei dan a zirin Guinness World Record siamna chance a awm a nia! Sidhu Kshetri, kum 42, software engineer chuan punching bag hnek rei ber record a siam a, chawl lovin darkar 55 leh minute 15 a hnek!
Sidhu hi martial artist niin, Taekwondo championships hrang hrangah India ai te pawh a lo awh tawh thin a, a hmaa hetiang record dinglai chu minute 5-in a rawn khum. Record siam nan hian Guinness guidelines-ah chuan darkar khat hnekah minute 5 zel chawlh an nei thei a, an chawlh neih hi hmang lovin an khawl thei bawk a, he chawlh an neih chhung hian ei leh in, intihfai leh mutthluk te an tih vek a ngai a, chutah second hnih danah vawi khat tal hnek hman ngei ngei a ngai a, hnek apiangin ban an ngil at at at tur a ni a, hnek zawhah ban chu a original position-ah a kir leh ngei ngei tur a ni bawk.
Sidhu chuan, “Darkar 20 vel bawr atangin a na tan tawh le a, khami chinah khan ka theihna hi engchen chiah nge tih ka inen a tul tiin ka infuih a. Rilru tih paukhauh tlat chuan na te chu ka tuar thei tiin ka infuih a. Darkar 30-na vel bawr kha a khirh lai ber niin ka hria, mu miah loin ka tlang parh a nia. Mahse, thiantha leh chhungte min fuih rengtu an awm a, anmahni vangin ka ti thei chauh a ni. Tawpsan mai kha chu ka tum chuang lo a, darkar khat chauh ti leh hram rawh tiin keimah ka infuih ve sauh sauh bawk a ni,” a ti.
Sidhu chuan record siam tum hian thla ruk chhung chu nitin darkar riat a inpuahchah thin niin a sawi a, zing dar 4-ah training session tanin, dar 8 thleng a bei a, tlailamah darkar 4 bawk a ti leh thin.
Sidhu hi Guinness World Records-ah a mikhual tawh lo a, 2013 khan minute thum chhunga martial arts kick tihnem thei ber record siamin, vawi 620 a kick hman a, 2011-ah minute khata martial arts kick tihnem thei ber record siamin, vawi 168 a kick hman bawk. Mahse, heng record pahnih te hi Pakistanni martial artist Ahmad Amin Bodla’n a rawn khum ve ve tawh a, Sidhu hian a record title hi lak let leh a tum dawn niin a sawi bawk.