Punjab BJP hqrs beihnaah Pakistan ISI inrawlh ring

On Apr 6, 2026 0 0

Chandigarh-a BJP Punjab Headquarters pawna bomb puak kaihhnawihah Inrinni khan mi panga man an ni a. Chandigarh police leh Punjab police-a counter-intelligence wing-ten beihpui an thlak dunah hian hand grenade pakhat leh silaimu an man tel a. He thil hi Pakistan-a hnuchhui pawl, ISI nen pawha inzawm ni theiin an ngai.
Mi mante hi Shami tia koh, Balwinder Lal; Jassi tia koh Jasvir Singh; Channi tia koh, Charanjit Singh; Rubal Chauhan leh Abhijot Sharma, tia koh, Mandeep te an ni a. Pawikhawihnaa inhnamhnawih pawimawh dang pahnih, Gurtej Singh leh Amanpreet Singh te erawh an tlanchhe mek a, police team-in man tumin beihpui an la thlak mek.
Chhui tawh chinah chuan heng mite hi Pakistan ISI-in a thlawp tih hmuhchhuah a ni a, Portugal leh Germany-a awm ram dang mite kaihhruaina hnuaiah thil kalpui a ni a. Thubuai siamsakte hi inthlunzawm nghet tak pawla tel an ni a, pawikhawihna thlenna tur hian mi dang pawh an an hmang nia hriat a ni.
Chhuinaah hian mi mante hian hand grenade, ralthuam leh silaimu an a thawn kual tih pawh hmuhchhuah belh a ni a. An thil thawnte hi mi eng emaw zat kaltlanga tiin a tawpah pawikhawihtu ber hnenah hlan a ni a. Portugal-a awm, Jot tia an koh, Baljot Singh-a thupek angin puhte hian an chetna chu an ruahman a ni.
Chhui chhung hian police team tanghote chuan hand grenade pakhat leh Zigana 30 bore silai pakhat an hmuchhuak a, a mi 10 an hmu bawk.
An inthlun zawm dan kimchang hai chhuah a nih theih nan an indawr dan zawn chhuaha a lu lam leh a mawng lama awmte pawh hriat chhuah ngei tumin hma lak mek zel a ni.
Chandigarh-a BJP pisa kawta bomb tihpuah hi Thawhlehni kal ta tlai dar 05:00 vel kha niin a bula lirthei dingte a tichhia a, thi leh hliam erawh an awm lo va. A chhuinaah hian National Investigation Agency (NIA) team pawh an inrawlh.
Bomb puak hnu lawkah social media-ah video a chhuak a, a titu zinga pakhat chuan grenade rawng dum pin chu a phawi a, a puahna lam hawiin a vawm a, mi dangin he thil hi a record bawk a. A hnuah an pahnih hian kein an tlanchhia tih hmuh a ni a, CCTV footage-a a lan dan chuan Mohali lam panin an tlanchhia a ni.