Putin-a leh US palaite inbiain rah tha la chhuah lo

Putin-a leh US palaite inbiain rah tha la chhuah lo
Russian President Vladimir Putin-a leh US President Donald Trump-a palai lawkte inbiakna thar chuan Ukraine-a muanna a awm theihna tura inremna lam a la hawi thei lo.
Kremlin thupuangtu chuan Moscow-a inbiakna hi ‘thil tha tak’ a nih thu a sawi rualin rawtna awm thenkhat chu Russia-in a pawm thei lo tih a sawi.
Trump-a special envoy Steve Witkoff leh a makpa, Jared Kushner te inbiaknaah hian tel US team lam hian Moscow an chhuahsan thlengin engmah an la sawi ve lo.
Thawhlehni tukah khan Putin-a hian a Kyiv leh Europe tangrualin an tihdanglam US rawtnate chu pawm theih a nih loh thu a sawi a, Europe hian ‘indo an duha bul an tan a nih chuan kan inpeih’ a ti nghe nghe.
Ukraine leh a tanrualpuite hian US rawtna neih hi tihdanglam a tul tih an lo sawi tawh a, White House chuan rang taka muanna a awm theihna tura leh Kremlin tana pawm nuam lutuk a siam niin an sawi.
US rawtna hi November thlaa a put hnuah Russia tana hlawkna tur tam tak awma ngaih a ni a, a hnuah tihdanglam erawh a awm nual.
Moscow-a inbiak zawhah Putin-a thawhpui hlun tak, Yuri Ushakov-a chuan Kremlin hian ‘point thenkhat an pawm a; mahse, thenkhat chu a sawisel’ tih a sawi.
Moscow leh Kyiv inkara inremna siam tura mutan lian ber pakhat chu Ukraine-in a ram eng emaw zat a chân tur leh Europe-in himna a pek tur tel loh chu a ni.
Moscow leh Ukraine thawhpui European-te chuan a hran ve vein inremna atana rawtnaah duhkhawp loh lian dang an la nei bawk.
An inbiak hma lawk hian Putin-a chuan sipai ralthuama Kyiv puitu Europe khawmualpui chu na takin a vau nghe nghe a ni.
Ukrainian President Volodymyr Zelensky-a chuan Kremlin-a inbiakna hi US team-in an hrilh ve a beisei thu a sawi a, hetih rual hian Witkoff leh Kushner hi Kyiv emaw, European khawmualpui dangah emaw an peng em tih erawh hriat a ni rih lo.
Muannna a awm theih nana inbiakna a kal mek laiin indona mualah pawh an la inbei zel a. Ukrainian sipaite chuan Russian sipaite nen khawchhak lama Pokrovsk-ah an indo nasa niin an sawi a, Moscow chuan khawpui hi an la tawh niin an sawi thung.
Russian defence ministry-in Telegram-a video a dahah chuan sipaiten khawpui hmun pawimawhah flag an tar lan tilang a, he khawpui hi kum khat chuang lak tuma an beih a ni.
Russia-in February 24, 2022-a Ukraine a rûn atang khan lehlam lehlamah sipai sang tel thi leh hliam an awm tawh a, civil mi pawh 14,000 chuang an thi tawh niin UN chuan a sawi.
Civil mite hmun beih zingah kindergarten, damdawi in leh chenna pawh a tel a, a bikin zan lamah drone leh missile-in an inkahsak nasa a ni.
Soviet hun laia ram khat ni thin hi kum 2014-a Ukraine-a Russian tantu president paih thlak a ni leh Russia-in Ukraine khawchhak lama Crimea an luah atangin an inep tawh a ni.