Putin-a’n ni thum chhung inkahhai a puang

Putin-a’n ni thum chhung inkahhai a puang
Russian President Vladimir Putin-a chuan Ukraine-a indona kal mekah inkahhai lailawk a puang.
Kremlin chuan inkahhai hi May 8 zing atanga May 11 thleng a ni ang a, hei hi Indopui II-naa hnehna chan lawmna neih hun nen a inhmu chiah a ni.
Ukrainian Foreign Minister Andrii Sybiha erawh chuan inkahhai hi ‘ni 30 tal awh’ ni tur a nih thu a sawi ve thung.
Ram pahnih inkara inremna a awm theih nana palai hna thawktu, US President Donald Trump-a chuan inkahhai nghet a awm a duh niin White House chuan a puang bawk.
Kremlin hian Easter khan darkar 30 awh inkahhai a lo puang tawh bawk a; mahse, hei hi khawi lam ve ve mahin zawm lovin an bawhchhe nasa hle.
Ukraine-ah hian inkahhai puan tumna vawi 20 chuang a awm tawh a, a hlawhchham vek a, hun rei lo te silai puak a chawlh erawh a awm ve thing.
A tharlam ber, Easter inkahhai pawh kha hmun tlemah chauh indona a chawl a, lehlam lehlam hian bawhchhiaah an inpuh tawn.
Thawhtannia Kremlin-in thuchhuah a siamah Putin-a hian ‘mihring dinhmun thlirin’ inkahhai hi a pawm tih an tar lang.
“Russia chuan Ukrainian lam pawhin he tih dan hi an zawm a beisei a. Ukrainian lamin an bawhchhia a nih chuan Russian sipaite chuan an tih ang zelin a chhang let ang. Russian lam hi chuan muanna a awm nana intiamkamna awm miah lova inbiak pawh a inpeih tih a puang tawh a, Ukrainian harsatna tibova ram dang tahwhpuite nena sawiho a inpeih,” an ti.
Ukrainian Foreign Minister Sybiha chuan chhangin, “Russia hian muanna a duh a nih chuan inkahhai a awm nghal tur a ni,” a ti ve thung.
Sybiha-a chuan Ukraine chu ‘inkahhai rei leh tlo zawk thlawp turin a inpeih reng a. Chu chu kan rawtna pawh a la ni reng a, a lo berah ni 30 tal’ tih a tar lang.
White House press secretary Karoline Leavitt chuan Trump-a pawh ram pahnih hruaitute awm danah a rilru a hah hle tih a sawi a. “Inkahhai nghet a duh,” a ti.
“Vladimir Putin-a’n tukina inkahhai lailawk a tum pawh ka hre thiam a. President chuan thihna leh thisen luang titawp tura a ngheta inkahhai a duh a ni,” a ti.
Washington hian palai hna a thawk a, Trump-a sorkar hian hma lam panna a hmuh loh chuan inhnuhdawh hialah a vau.
Russia hian Ukraine hi February 24, 2022 atang khan rûnin tunah hian an ram 20% chuang a thunun tawh a, heng zingah hian kum 2014-a Moscow-in a luahsak, chhim lama Crimea peninsula pawh a tel.
Indona a chhuah atang hian mi sang tel, a tam ber sipai thi leh hliam an awm tawh.