Putin-a’n sipai 1,60,000 a la thar dawn

Putin-a’n sipai 1,60,000 a la thar dawn
President Vladimir Putin-a chuan mipa kum 18 leh 30 inkar sipai atan 1,60,000 a la mek a, hei hi kum 2011 hnua Russia-a vawi khata sipai lak an tam ber tur niin an sipai neih tihpun a tum mek.
Sipai lak tur hi Putin-a’n Russia-in a sipai neih zawng zawng maktaduai 2.39 dawn tlintir an tum thu leh thawk lai pawh maktaduai 1.5 tlintir an tum tih a sawi hnua kalpui a ni.
Lak thar turte nen hian kum thum lo awm leh turah chuan 1,80,000 chuangin an pung dawn a ni.
Vice Adm Vladimir Tsimlyansky-a chuan lak tharte hi Ukraine-a indonaa tirh an ni dawn lo tih a sawi a, tuna indona an kalpui mek hi chu Russia hian ‘special military operation’ tiin a sawi a ni.
Hetih lai hian indona a chhuah tirh khan sipai lak tharte pawh Ukraine-ah hian tirh niin Russia ramri velah an thi nasa nia sawi a awm.
April leh July thla inkara sipai lak thar a nih dawn mek lai hian US chuan inkahhai a awm theihna turin a bei mek zel bawk.
Thawhlehniah pawh khan tharum thawhna a la awm a, Ukraine chuan Russian-ten chhim lama Kherson khawpui power hmun beiin mi 45,000-in electricity an neih loh phah niin a sawi.
Russia pawhin Ukrainian khua, Donetsk region-a Rozlyiv an lak thu an sawi bawk.
Russia-in sipai a lak thar tur hi nikuma tun ang hunaa lak aiin 10,000-in an tam zawk a. Nikum kum tir atang khan sipaia tang thei chin upa ber kum pawh tam zawk an tan theih nan kum 27 atangin 30-ah a tipung bawk.
Russia hian kum khatah vawi hnih sipai lak a kalpui thin a, heti chung hian hun bi tuam neia rawih leh North Korea atanga puitu sipai pawh a nei tho.
Moscow hian Ukraine-a sipai a hloh tawh zat a sawi tha duh lo va, BBC leh Mediazona chuan 1,00,000 tal tling tawhah a ngai a. A tak takah phei chuan a let aia tam a nih an ring.
Putin-a hian February, 2022 atanga Ukraine lak tuma an beih hnuah a sipai tihpunna turin a lian thamin vawi thum sipai a la tawh.
Russian defence ministry chuan December, 2023 khan Unkraine indona avang leh Nato-in huang a zauh zel avangin an sipai tihpun an tul thu a sawi.
Nato hian huang zauh zelin Finland leh Sweden an tel thar a, Ukraine-in zawm ve a tum chu Russia-in a beih chhan ber a ni bawk.