Putin rawtna Italy leh Germany ten hnawl

Italy leh Germany leader te chuan Russian President Vladimir Putin an Ukraine indona a inkahhai a awm theih nana ruahmanna a siam chu an hnawl thu an sawi.
Italy Prime Minister Giorgio Meloni chuan Russian president ruahmanna chu ‘propaganda’ tihsakin Putin ruahman ang chuan Ukraine chu Ukraine atangin a inhnukdawk tur a ni tih ang a ni a ti a.
German Chancellor Olaf Sholz pawhin Putin ruahmanna siam chu ‘dictatorial peace’ a tihsak bawk. Ukraine territorial integrity humhim chu an tum bur tiin an sawi bawk a.
Kar kalta Zirtawpni khan Putin chuan Ukraine chuan tuna Russia-in Ukraine region pali a then lai a awp mek atanga a sipaite a lachhuak vek a nihchuan inkahhai a remtih tur thu a sawi a ni.
Andriy Yermak, chief of staff to Ukraine President Volodymyr Zelensky chuan Swiss summit neihnaah Ukraine independence, sovereignty emaw territorial integrity chu khawih danglam an remti dawn lo tiin a sawi a.
Swiss summit neihnaah hian khawvel ram 90 chuanga global institution te an tel a, Russia in Ukraine a run hnua Ukraine puala inhmuhkhawm lian ber a ni bawk.
Russia leh a thahwpui ber China te chu he summit-ah hian sawm an ni ve lo bawk.
Putin rawtna siam chungchang sawiin Meloni chuan, “Inremna awm theih nana Ukraine te chu Ukraine atanga inhnukdawk tura tih tlat chu awmze nei lo a ni” tiin a sawi.
Britain Prime Minister Rishi Sunak pawhin Russian president chu nataka a dem thu saiw bawkin Russia hnena ralthuam petute pawh history dik lo lamah an tang a ti bawk.
Zelensky chuan Ukraine chu diplomacy a dah pawimawh hmasa tia sawiin tangruala tanhona chuan indona a titawp thei a ti bawk a.
“He summit-ah hian history kan siam a ni. Inremna a rang thei ang bera a thlen pawh ka beisei” tiin a sawi bawk.
Chutih laiin Putin thung chuan Ukraine duh dan anga inremna siam tuma hmalakna tin te chu a pawm lo bhru thung a. Ukrainian region pali atanga Ukraine inhnukdawk tura a duhna te hi Russia-in a thenlai chauh a luah leh awp mek a ni a. Kum 2022 khan heng region ah te hian referendum neiin Russia a beh duh a ti a, mahse, kha referendum kha Ukraine leh khawthlang ram te chuan an hnawl thung.
European Commission chief Ursula von der Leyen chuan Ukrainian ram ram dang sipai tena an awp mek khawih thiang lova dah chu chhanna a ni lo. Nakin zela indona recipe a la chhuah theihna zawk a ni a ti bawk.
Swiss summit a tel ram hruaitute chuan Ukraine territorial integrity humhim an tum zia draft declaration an siam zui nghal bawk a. Hei mai bakah hian Black Sea leh Azov sea te chu global food security atana pawimawh a nih avangin commercial shipping him taka a kal theih nan hmalak an tum bawk a ni.
Swiss summit neih hma hian G7 leaders te chuan Russian asset frozen te atanga interest te chu Ukraine-in Russian forces te a beih let nan pek an lo remti tawh a.
February 2022 a Russia-in Ukraine a run hnuah G7 ram leh EU te chuan Russian asset $325 billion vel an freeze sak tawh a, chuta tanga interest pung chu kumkhatah $ 3 billion vel lai a tling a ni.
G7 ram te chuan Russian asset interest pung $3 billion chu Ukraine-in international market atanga loan $ 50 billion a lak rulh nan an hmansak dawn a ni.
Mahse heng sum te hi kumin kum tawp dawnah chauh Ukraine hnenah a thleng hman thung dawn a. Chutihlaiin Ukraine chuan ralthuam tak zawk a mamawh thu sawiin a bik takin air defence system chu Russian missile leh drone beihlet nan a mamawh takzet thu sawiin F-16 fighter jet khawthlang ram ten an pek pawh tun summer hian Ukraine-ah a thleng hman tura ngaih a ni bawk.