PWD-a thawktute hlep ru tam anga kan hmuh thin hi a lo ni lo – Vanlalhlana

PWD-a thawktute hlep ru tam
anga kan hmuh thin hi a lo ni lo
– Vanlalhlana
Public Works Department chu mipuiin sum tamna leh a thawktute pawh hlepru tam nia an hmuh ang chu a takah a lo ni lo tih a hmuh thu a changtu minister Vanlalhlana chuan a sawi.
Zirtawpni khan Mizoram PWD hotute chuan an hnathawh kal mek thlirhoin an thukhawm a. PWD minister hian a chhung a luhchilh takah chuan PWD chu mipuiin sum tamna leh a thawktute pawh hlepru tam nia an hmuh ang chu a ni lo tih sawiin, “Department inawp dan, inenkawlna leh tanrualna a tha hle in ka hria,” a ti.
Mipui tana hna thawktu an nih angin mipuiin an thlawp that avangin lawmawm a tih thu a sawi a. Mipui tana theihtawp chhuah zel tur leh party tan lam nei loa tu pawh sawrkar se tha taka sawrkar thawhpui turin a fuih.
Mizoramah kawngpui dang awm mah se, state PWD chu a ram neitu an nih angin, an chan chhung ni lo NHIDCL leh BRO kawngpui chanah pawh a tul chuan tha an thawh mai zel tih a sawi bawk.
Vantlang nen thawh dun a pawimawh, tiin, “Labour thawh thin kawngpui enkawl, kawngba sam leh tui luankawr tihfai hi mipuiin thawk zawk ta se tha zawkin a rinawm,” Vanlalhlana hian a ti a. Aizawl traffic tawt lutuk tih ziaawm dan tur PWD hotulute nen an ruahman chu sawrkarah thlenin, sum hmuh theih dan ngaihtuah an tum tih a sawi.
Commissioner & secretary leh engineer -in- chief pawhin thu an sawi a. Engineer-te chu DPR siam lai atanga uluk, quality-a tan lak, contractor-te harsatna en uluk puiin an hna a that phawt chuan bill pek zung zung, court case reng reng uluk taka zirchian a, hma an lakna kawnga nakina court case lo awm thei laka fimkhur tur tih te an sawi.
PWD-ah hian engineer -in- chief pakhat, chief engineer pali leh chief architect pakhat awmin, Circle 10 leh World Bank & Asian Development Bank projects enkawltu PIU pakhat awmin, Division 30 a awm.
Thutkhawmah hian chief architect leh chief engineer-ten an enkawlna hnuaia hna powerpoint presentation hmangin an entir a, sawiho nghal zel a ni.
Mizoram PWD hian kawngpui – National Highways, State Highways, Town & City Roads, Village Roads adt km 6731, sawrkar building 2952 leh lei 129 an enkawl a. Thawktu post 2180-ah 870 hnawh khah loh awmin, heng zinga post ruak tam ber junior engineer ah post 158 leh AA/AE/SDO ah post 65 a ruak. Hei hian nasa takin department a nghawng tih sawi a ni. Tunah hian AE (Civil) 5 lak phalna neiin a dang 10 phalna hmuh mai a beiseiawm tih sawi a ni.