PWD bawhzui dan enzui chungin kawng dang tan

PWD bawhzui dan enzui
chungin kawng dang tan
PWD-in kawng thawmthat an tum dan an sawi enzui chungin Mamit kalpawhna kawngpui chu October 16 zing dar 7.00 atang khan tiam chin awm loa dan tan a ni.
Kawng dangtu All NGOs Mamit & Commercial Vehicle Association Mamit chairman Vanlalremruata chuan, mipui harsatna siam zawnga hma lak hrim hrim an tum a ni loa, kawngpui chhe lutukin ngaihven a hlawh a, thu mai ni lo, a taka hmalakna hmuh ngei a nih an beisei vanga an ruahmanna awm tawh sa kaltlangpui an ni tih a sawi.
Sawrkar lam chuan October 16 atang hian kawng thawm hna an thawk tan dawn tih an sawi a, hetih lai hian an kawng thawmthat hi an duh ang a nih loh chuan kawng dan hi chawlhsan an tum lo tih kawng dangtute hian an sawi a ni.
October 15 zan khan Mamit bawrhsap leh PWD engineer in chief nen an inbiaknaah All NGOs & Commercial Vehicle Association hruaitute hian, Mamit khawpui leh district chhung khaw dangten harsatna an neih dan an sawi a. Mamitah petrol leh diesel a awm loa, damlohna vanga hmunpui zawk pan ngaite tan harsatna nasa tak a thlen a, tun dinhmunah blacktop mam han beisei theih a ni lo chungin, a theih ang anga siam erawh an phut tih an sawi. Tuna kawng dinhmun chu a chhiat em avangin, kawngpui dan avanga mipui harsatna tawh tur pawh ngaipawimawh thei loin, dan chah tum an ni tih an sawi a ni.
PWD engineer in chief H Zoramliana chuan National Highway kawngah Mizoram PWD-in thuneihna pumhlum a nei loa, mipuiin harsatna nasa tak an tawk tih an hriatpui a, kawngpui hial dan tum a ni chu a hriatthiam pui tih a sawi. Kawngpui dan tum chu a thlawn loh ngei a beisei tih sawiin, October 16 atangin kawng thawmthat hna chak zawka bawhzui a ni dawn tih a sawi a ni.
Hemi hnu hian All NGOs & Commercial Vehicle Association hi an thukhawm a. An thil tum hi kaltlang pui phawt nise, an ti. Lirthei hmangin kawng hi dangin, hmun hnihah duty an indah a, chhunzan zawma duty an tum a ni.