PWD-in National Highway pakua enkawl

Mizoram PWD-in National Highway pakua an enkawl mek a, PWD hnuaia chief engineer office, highways-in an enkawl a ni.
Budget Session neih mekah Lawngtlai West bialtu C Ngunlianchunga zawhna, ziaka chhan chi, Mizoram PWD-in highway an enkawlte hming chu PWD minister Vanlalhlana’n chhangin National Highway pakua a sawi.
Minister chhannaa a lan danin, NH-54 (New NH-6), NH-108 (New NH-44A), NH-6 (Spur), NH-150, NH306A, NH-154 (New NH-6), NH-502 (Zero Point to Siaha), NH-502A leh NH-6 (Champhai to Zokhawthar) te a ni.
Lawngtlai West bualtu zawhna bawk, ziaka chhan chi chhangin PWD minister hian kawng siam nana sum senso zat House a hrilh bawk.
Kawng siam (blacktop) nana sum senso hi a kawng zau zawng azir te, a kawng dinhmun azir te, hmanraw hman tur phurhna hnaih leh hlat dan azirtein a danglam thei tih a sawi.
Minister sawi danin, Sing lane kawng, GSB leh WBM layer a thar phah a nih dawnin blacktop nan bituminous concrete hman a nih bawk chuan km 1-ah cheng nuai 130 vel sen a ni ang a ti.
Open graded premix carpet leh seal coat-a blacktop a nih chuan km 1-ah cheng nuai 93 vel sen a ngai ang, a ti bawk.
A chi dang pawh a sawi a, GSB leh WBM tel lovin km 1 blacktop nan hian bituminous concrete hman a nih chuan senso chu cheng nuai 30 atanga cheng nuai 75 te a ni thei tih a sawi a, premix carpet leh seal coat hman a nih chuan cheng nuai 20 vel hman a ni tlangpui tih sawiin, hei hi blacktop chhah zawng, hlai zawng leh specification hrang hrang vangte a ni tih a sawi.