Quarter-final lut zingah Swiatek…

Quarter-final lut zingah Swiatek…
Minute 59 lek chhunga 6-0 6-1-a Eva Lys sawp chungin major title panga la tling tawh Iga Swiatek chuan Australian Open hmeichhe singles last eight a lut a; inkhelh banah a that theih ang ber a la thleng zo lo tih a sawi!
Rod Laver Arena-a a hnehna awlsam a chan hnuah tun kha Swiatek tan kum 2022 hnu lama Melbourne khaw tournament liana quarter-final a luh leh vawikhatna niin, inkhelh bana an kawmnaah second seed chuan, “Kum 23 mi chauh ka la ni a, hmasawnna tur ka la nei zel mai. Ka theihna sang ber ka la tawngbaw zo lo cheu a, mahse, chuti chungin khati ang match-te khan inrintawkna min siamsak a, game khel chhe lo hleah ka inngai,” a ti.
Third round lama 6-1 6-0 ngawta Britain chhuanvawr Emma Raducanu pawh lo sawp tawh Swiatek kha German world number 128 lakah a la u hret a, chuti chungin Pole hian chetthat a harsatna Australian Open-ah chuan eng game mah hi nuamti taka khelh a harsat thu sawiin, kumin erawh a tlangnel lohna a ziaawm hret niin a sawi!
Champion lai Aryna Sabalenka chuan tuntum Melbourne Park-ah hian semi-final a thlen zawh loh palh hlauh chuan Swiatek hian Belarusian hmakhalhin world number one nihna a changlet leh thei dawn a ni.
Last eight lama Swiatek-i tum leh tur American eighth seed Emma Navarro chuan inkhel dangah 6-4 5-7 7-5-in Russian ninth seed Daria Kasatkina a hneh ve bawk.
Nimin vek khan Melbourne khawpuia tum hnih lai semi-finalist lo ni ve tawh Madison Keys pawhin rin loh takin sixth seed Elena Rybakina lakah 6-3 1-6 6-3 hnehna changin quarter-final a lut nawlh!
American 19th seed Keys hian Margaret Court Arena-ah a zawna match kua a chakna a nghakchhuak a; third round match a khelh laia hnungzang nain a tihbuai Wimbledon champion hlui Rybakina chu duhthusamin a la dam lo tih a hriat theih a, kum 29 mi Keys-i a lo hriam ve bawk si nen rinkai zawk ni chungin Kazakhstan star lian Rybakinaa tlawm ta mai a ni.
Kum 25 mi Rybakina hian third-round lama Ukraine nula Dayana Yastremska a hneh tum pawhin Melbourne-a hma sawn leh tur chuan ‘magic’ a mamawh tawh tur thu a lo sawilawk tawh a, an inhmachhawn hnuhnung vawihniha a hneh ve ve Keys lakah tuntum chu a chak zo ta ngang lo a ni.
2023 Melbourne finalist Rybakina a hneh hnuah Australian Open inbuatsaihna pakhat Adelaide Open champion Keys hian Ukrainian 28th seed Elina Svitolina chu quarter-final lamah a tum zui leh dawn.
Kum 30 mi Svitolina hian inkhel dangah 6-4 6-1-in an ram run mektu ram atanga zichhuak Russian Veronika Kudermetova a hneh a, a tum 12-na atan Grand Slam singles quarter-final lutin, a hnehna sualkchhuah chu an ram tan a hlan tih a puang a, inkhelh banah a tumpui Russian chu a chibai duh lo leh ngat bawk!
Svitolina hian inkhelh bana tihdan phunga an lo neih tawh ‘net’ hrula player inchibai chu kum 2022-a Russia-in Balarus thlawpnaa an ram a run hnu khan Russian leh Belarusian player-te lakah a la ‘boycott’ chhunzawm ta ngat ngat a; hetih chhung hian Russian player pasarih hmachhawn tawhin, a la hneh fai vek a ni.
Svitolina hian Thawhtanni men’s singles fourth-round match pakhata a pasal Gael Monfils leh American Ben Shelton inkhel chu Margaret Court Arena-ah enin a pasal a tawiawm leh.