R-Day lawmna tlar thumnaah Gandhi, Congress-in vuipui

R-Day lawmna tlar thumnaah Gandhi, Congress-in vuipui
Thawhtannia Republic Day vawi 77-na lawmnaah Leader of Opposition (LoP) pahnih, Mallikarjun Kharge leh Rahul Gandhi chu tlar thumnaah thuttir an ni a, hei hi Congress chuan sorkar beih phah nan an hmang nasa hle.
Delhi-a Kartavya Path-a Republic Day lawmnaah Rajya Sabha leh Lok Sabha-a eptu hruaitu berte tlar thumna daiha thuttir an ni hi Congress chuan sorkar tih dan phung palzut nia puhin kum 2014-a ro an rel laia thutna rem dan thlalak an tar chhuak bawk.
Congress General Secretary Randeep Singh Surjewala-a chuan sorkar chu nasa takin a sawisel a. “Ram khata LoP tih dan hian tih dan phung pangngai leh sorkar tih dan a palzut em? He thil hian sorkarin mi enhranna a neih chu chiang takin a pho lang a ni,” tiin X-ah a tar lang.
Congress MP Manickam Tagore-a pawhin Gandhi-a chu ‘BJP-in chiang takin an nuihsawh’ niin a tar lang a. Kum 2014-a LK Advani thutna tar langin, “Pu LK Advani thutna hi en rawh u. Engvangin nge tih dan tur (protocol) inphuah chawp? Modi-a leh Shah-a ten Pu Kharge-a leh Pu Rahul-a an nuihzat duh dan em ni?” a ti.
Kum 2014-ah hian Advani hi rorelna in khawi zawkah mah leader of opposition a ni lo va. Tlarhmaa thu tho, Arun Jaitley-a chu Rajya Sabha-a LoP niin Sushma Swaraj-i chu Lok Sabha-a LoP a ni bawk.
Sorkar chuan eptu party-in an sawiselna hi a la chhang lo va; mahse, sorkar hun pawimawhah hian thut dan tur indawt hi President’s Secretariat-in Table of Precedence a tihchhuah chu khauh taka zawm a ni thin.
LoO-te hi lal dan indawtah hian 7-na an ni a. President, vice-president, prime minister, governor, president hlui, deputy prime minister, chief justice, Lok Sabha speaker, cabinet minister, chief minister leh prime minister hlui hnungah a awm.
BJP erawh chuan Congress hi chhang tawhin thil thleng chu ‘politic khelh nan’ an hmang niin an sawi a. “Rahul Gandhi-a kha tlar thumnaa thut kha hrehawm a ti lo reng reng; Kartavya Path-ah khan ram pumin Brahmos missile-te kan lo lawm em em laia mi phena phone khalh kha duh zawk,” tiin BJP thupuangtu, Pradeep Bhandari chuan X-ah a tar lang.
Tun tuma thil thleng hian nikum Republic Day lawmnaa Kharge leh Gandhi an tel loh avanga BJP-in an sawiselna thawm pawh kha a rik leh phah.
BJP hruaitu, Amit Malviya-a chuan, “Chhinchhiah atan, danpui venghimtu nia inchhal, Rahul Gandhi leh Mallikarjun Kharge te chu Republic Day lawmnaa ka lo langsar an ni,” tiin a hun lai khan X-ah a tar lang.
Kumin Republic Day lawmnaah hian European Union hruaitu lawk pahnih, Antonio Costa leh Ursula von der Leyen te chu khual lian niina n tel a. Sipaiten an theihna an pho chhuah leh nunzia leh khawsak phung lantirte chu President Droupadi Murmu, Prime Minister Narendra Modi, union cabinet minister leh ram dang palaite nen an chhim a. Tun hi EU hruaitu lawk pahnihin India-a Republic Day lawmnaa khual lian nia an hmanpui hmasak ber a ni.