Raducanu a lo inhliam leh tawh!

2021 US Open trophy a rawn lak nawlh hnua hliamin a tihbuai chhoh tak deuh reng British number two Emma Raducanu chu Korea Open a khelh laiin a intina leh tawh a, Beijing Open khel tura hming a lo pekluh tawh atang pawhin a inhnuhdawh leh a ngai.
Hliam vanga season liamta pumpui deuh thaw a chawlh hnuah kumin hian khelmualah kirin world top 50 huang a rawn luah chho leh hman teuh viau a, mahse, karliamta Inrinni Seoul khawpuia Korea Open quarter-final match pakhat kha kephah hliam avangin a khel tluan thei lo leh ta tlat a, Beijing tournament lian khel tur hming Thawhtannia an tarchhuahah a tel a, mahse, chu pawh a hawisan a ngai leh rih ta a ni.
Kum 21 mi Raducanu hian X-ah a dinhmun tarchhuakin, “Ka ke lamah hliam ka nei a, vanduaithlaktakin, ngai awh tura chawlh ka mamawh leh ta rih a ni,” a ti.
Briton world number 54 hi Beijing main draw-ah hian first round-a qualifier hmachhawn tur leh a chak chuan second round-a Chinese fifth seed Zheng Qinwen tum thei tur a ni a, an veng lama a inenkawl a ngai leh ta zawk a ni.
Seoul-ah khan Russian Daria Kasatkina nen game nga an khelh hnuah Raducanu khan medical timeout a hmang a, set khatna a hloh zui tak hnuah khel zui thei loin a inhnukdawk zui ta a ni.
Beijing-ah hian inlan thei dawn lo mah se China hi a tournament khelh lehna tura ruahmanna awmsa a ni zui tho a, Covid-19 hripui lo chhuahna Wuhan khawpuia October ni 7 atanga khelh tan tur tournament atang chuan a la inhnukdawk rih lo phawt chu a ni a, a dam fel hman dawn em tih erawh hriat theih a ni rih lo.
Raducanu hian kumin July thla Wimbledon leh US Open inkarah khan tournament pakhat chiah a khel a, Seoul khuaa a intihnat leh hnua news conference a hmachhawn tumin mittui nen a inkhelh tlemzia a sawichhuak.