Rafa dang kan hmu leh tawh lo ang – Serena

Rafa dang kan hmu leh tawh lo ang – Serena
Serena Williams chuan tennis chawlhsan ta Rafael Nadal thlahna thu Instagram lamah tarchhuakin, Nadal-a tennis zinkawng hmu ve phaa a awm ngawt pawh a tan chawimawina a nih thu leh Nadal ang tumah an lo chhuah ngai tawh loh tur thu a tarlang tel.
Williams chuan, “Mi tam takin a suangtuah pawh an suangtuah ngam loh tur career neitu i nihna zawnah ka lawmpui che a, i inkhelh chhung leh chu chuan mi ropui bika a siam lai chea ka lo inkhel ve thei kha nihlawh ka inti.
“Khawng zawk, khauh zawk, chak tam zawk, bansan ve mai mai lo tur leh fight tlat tura phurna leh thathona min siamsaktu i ni a, i sulhnu min hnutchhiah hi a reh ngai tawh lo ang.
“I bultan tirh lai atanga i tun hun thleng hmu theia ka awm hi ka tan chawimawina a va ni em!
“Dam reng ang che, Rafa!”
Nadal-a Davis Cup teammate Carlos Alcaraz pawhin a chipui chu chakna petu leh a tennis zinkawnga fuihphurtu tia sawiin Nadal lakah lawmthu a sawi.
Lasi thawnthu ang maia tawpna hlimawm a beisei laiin a tournament hnuhnungberah Rafael Nadal chu tennis-a ram leh ram inelna lian Davis Cup-ah beisei angin Spain tan a inlan zo lo a, Thawhlehni khan Spain chu quarter-final-ah an mikhual Netherlands hneh loin an superstar ho hian an tlawm!
Malaga khawpuia Palacio de Deportes Jose Maria Martin Carpena Arena-ah ram pahnih hi Davis Cup semi-final luh tumin an innuai a, a ram a tlangpui zawh loh hnuin Grand Slam title 22 la tling tawh Nadal hian mittui nen a tennis zinkawng a zawh tawp ve ta a ni.
Kum 38 mi hi a competitive match hnuhnungberah Dutchman Botic van de Zandschulp chuan 6-4 6-4-in a hneh a, Netherlands lamin best-of-three quarter-final tie-ah hma an hruai phawt.
Singles match hnihnaah Spain tennis king thar rawn ni chho ta mek Carlos Alcaraz chuan 7-6(0) 6-3-a Tallon Griekspoor hnehin quarter-final tie a rawn tinung ve leh a, mahse, deciding doubles-ah French Open leh Wimbledon champion Alcaraz leh Marcel Granollers inkawp chu 7-6 (7-4) 7-6 (7-3)-in Van de Zandschulp leh Wesley Koolhof tangdun lakah an tlawm a, Spain beiseina a zuihral ta a ni.
Spain kha chak se Nadal-a tennis zinkawng chu la tawp rih lo deuh tur a ni a, Zirtawpni semi-final lamah Germany leh Canada inkhela chak zawk zawk la hmachhawn thei tur a nih laiin Dutch-hoin a tum aia hma hretin an nawrliam lui ta a ni!
Mallorcan hi Davis Cup-ah Spain tan vawili a champion tling a; tunhma lama team event singles match 30 a khelhah vawi 29 chakin, tun Thawhlehni hmaa a tlawm awmchhun chu kum 2004 daih tawha he inelna a hmachhawn hmasakber tuma Jiri Novak a hneh loh kha a ni.
Chuti taka sulhnu a neih hraw na ngei hmangin a career zialfel a duh a, Netherlands nen an inkhelh hma hnam hla an sak lai atangin a mittui hru lai hmuh tur a awm.
Rafael Nadal hian thla hmasa mai khan Davis Cup Final Eight chu kum 23 khuh a professional career-a a tournament hnuhnungber a nih tawh tur thu a nemnghet a, a lo sawilawk tawh ang ngeiin Thawhlehni khan mittui nen a racket a tung ve ta nge nge a ni.
Nadal-a hun hnuhnung hmang hian court chhunga fans, chhungkua, a thiante leh a team-mate rualte hmaah tawi hran lo takin thu a sawi a:
“Thingtlang khaw te takte atanga chhuak naupang ka ni a, ka patea hi tennis coach a nih avang leh ka chhungte min thlawpna ka hmuh that avangin ka vannei ta a ni.
“Mi tamtak hi chu an thawkrim em em a, kei erawh ka hringnunin vanneihna a ken tel avanga nihlawh ka ni ve pah bawk a; tennis vang hian theihnghilh leh mai mai tawh loh tur tawnhriat ka khawl tam hle a ni.
“Min hriatreng dan tura ka duh chu pa tha tak ni phawt se, a tum ram thleng tura zinkawng thui tak zawhtu tih hi ni leh bawk teh se,” a ti.
Parisian clay-a champion ngun ber record siama French Open title 14 la tling thei awmchhun Spaniard hi, tarlan tak angin, Davis Cup-a a match hmasaberah a tlawm a, he tournament-a a match hnuhnungberah a chak lo leh chiah a, thil intawng fuh ve tak chu a ni.
Malaga khawpuia an superstar chawl tur thlahtu fans engemawzat chuan ‘Gracias Rafa’ tih inziahna scarf an awrh a; mipui 11,500 lenna Palacio de Deportes arena chhunga awmte chu “Rafa, Rafa, Rafa” tiin an au rual dual dual bawk.
Spain rama infiammi ropuiber an thlahliamna hmunah ngei hian a hma ni khan a elpui kumhlun ni thin leh a thian tha tak ni bawk Roger Federer pawh hmuh tur awmin, kum 2022 London khuaa Laver Cup kaltlanga chawl ve ta Swiss 20-times Grand Slam champion nen hian mittui nen an lo inkuah vawng vawng tawh a ni.
Spanish great Nadal-a thlahna hunah hian a tennis zinkawng thui leh ropui tak chu screen-ah tarchhuah niin, sporting superstar-te message hrang hrang phochhuah a ni bawk a, chu’ng zingah chuan tennis legend rual Roger Federer, Novak Djokovic, Serena Williams leh Andy Murray telin, footballer zingah David Beckham, Andres Iniesta leh Raul, golfer Sergio Garcia-te’n Nadal-a pual hian thu leh hla an cheh ve bawk.
Grand Slam champion tam kawnga men’s singles player hlawhtlingber dawttu ni chunga chawl ta Nadal hian mipa zinga major title lak tam lamah tluk loh awmchhun pakhat a nei a, chu chu a elpui dang Novak Djokovic a ni.
‘King of Clay’ tia hriat Nadal hian French Open singles title 14 a lakna kawnga Roland Garros major match 116 a khelhah vawi 112 a chak tling a, tournament pakhata Grand Slam singles title la hnem ber a ni.
Nadal hi tum li ngawt US Open champion a nih tawh bakah Australian Open leh Wimbledon title vawihnih ve ve a la bawk.
A trophy khawlbawmah Olympic singles leh doubles gold medal khai telin, Davis Cup-a vawili Spain a champion-pui zinga a hnuhnungber chu kum 2019 kha a ni.
Kum 2008 champion team-ah khan tel bawk mah se hliam avangin final a khel thei lo.