Ragasa-in Philppines nuai, chakna hloh hretin China pan

Philippines-a mi sang tel hmun hima insaseng ngaih phahna, super typhoon chuan khawmual a kai hnuah a chakna ‘a hloh hret’ ta tih an ram khawchin zirtute an puang.
Super typhoon Ragasa hi Thawhtanni tlai dar 03:00 (India-a chhun dar 01:30) vel khan Philippines hmar lama Cagayan province, Babuyan Islands-a Panuitan Island-ah khawmual a kai a. Darkar khata km 285-a chak thlipui keng niin khawthlang hawia kal zelin China chhim lam a pan.
Khaw chin zirtute chuan thawk na lutuk lo mah se ‘nunna atana hlauhawm khawp tui fawn’ a siam thei tih sawiin metre thuma sang thlengin tui a phul thei tih a sawi.
Thuneitute chuan tui lian leh lei min, chenna in leh thil dang tichhe thei khawp a thleng thei tih an sawi.
An khawpui, Manila leh ram chhung hmun dang dangah sikul leh sorkar pisate khar a ni a. Ragasa-in khawmual a kaina, Batanes/Babuyan thliarkar hi hmun kilkhawr taka awm niin mi 20,000 chuang chenna, mi rethei tak tak awmna a ni.
Thliarkar pakhat, Calayan-a information officer Herbert Singun chuan sikul chung a hawk a, metre 30 vela hlaa evacuation centre an siam chungah tlain mi pakhatin hliam tenau a tawrh phah tih Agence France Presse (AFP) a hrilh.
Calayan hi Taiwan atanga km 740 chuanga hlaa awm niin khawchhak lama Hualien khua atangin mi 300 vel thiar chhuah an ni.
Ragasa hian Taiwan hi a nuai dawn chiah lo va; mahse, thliarkar khawchhak lamah chuan ruah tam tak a sur phah dawn tih an sawi thung.
Taiwan chhim leh khawchhak lama ramngaw hmunte chu Thawhtanni atang khan khar niin lawng service pawh dintir a ni.
Super typhoon Ragasa hi hurricane Category 5 anga na a ni.
China-a Guangdong province thuneitute pawhin mi chengte chu ‘chhiatna lian’ thleng thei lakah inralring turin an hrilh tawh a. Ruah tam tak leh thli na tawk takin Thawhlehni atangin a nuai tan a, ni hnih hnu vel (Ningani)-ah Rahasa hian khawmual thleng turin an sawi lawk.
Typhoon thawk tur avang hian Shenzhen khawpuia thuneitute chuan mi 4,00,000 vel hmun hima saseng turin an inruahman tih an sawi.
Hong Kong-ah pawh thuneituten Thawhlehni atang khan ‘khaw awm dan a hniam zual thut’ tih sawiin zirna lama hotute pawh sikul kai dan tura ruahmanna siam turin an ti.
Hong Kong-a Cathay Pacific chuan khawpuia an thlawhna thlawk chhuak leh lut tur 500 chu Thawhlehni tlai dar 06:00 atangin an thulhtir a, Hong Kong Airlines pawhin khawpui chhuahsan tur an chawlhtir bawk tih ans awi.
Ragasa hi Philippines-ah chuan Nando tiin an sawi a,, Asia chhimchhak ram hian fur ruah tam tak dawnga tui lian nasa takin a chenchilh hnuah an tuar a ni.