Rahman-a sorkar hnuah Bangladeshi tan visa pek leh tan tum

Rahman-a sorkar hnuah Bangladeshi tan visa pek leh tan tum
Bangladesh-a Tarique Rahman-a kaihhruai sorkar a din hnu rei lo teah India chuan thenawm rama visa service a tihtawp lailawk zawng zawng chu a ngai anga kalpui leh nghal tumin hma a la niin ram palai pisaa hotu lianin a sawi.
Sylhet-a Indian consular hotu pakhat, Aniruddha Das chuan visa service zawng zawng tinung leh turin inbuatsaihna kalpui mek a ni tih a saiw niin bdnews24-in a tar lang.
“Damdawi thil leh double-entry visa bik chu tihchhuah leh tawh a ni a, huang dangte pawh kalpui leh tumin hma lak mek a ni a, heng zingah hian travel visa pawh a tel,” tiin Das chuan Sylhet District Press Club-ah a sawi a ni.
bdnews24-in a tar lan dan chuan Sylhet-a Indian assistant high commissioner pawhin visa pek chhuah chungchang bikah hian ram pahnih inkar chu a tha thei ang bera kalpui leh tum a ni tih a sawi a. India-Bangladesh inkar chu ‘inhriat thiam tawnna leh inzahna lungphuma innghat’ a ni tih a sawi.
Das-a chuan, “Ram pahniha chengte hi inthian tha an ni a, hun rei tak ata tawh inhre thiam tawp chungah inkungkaihna nghet leh changtlung tak lo nei tawh an ni,” tiin a sawi niin bdnews24 chuan a tar lang a. Ram pahnihte hian ‘khawthlir thuhmun neiin’ thawhho an duh a ni tih a sawi bawk.
Zirlai hruaitu, Sharif Osman Hadi-a a thih hnuah ram pahnih inkar hi a chhe hman hle a, Bangladesh-a Indian visa centre zawng zawng chuan an hna an chawlhsan vek a. Zirlai hruaitu thihna hian Bangladesh-ah lungawi lohna nasa tak thlenin India duh lohna boruak a tilian hle a. A hma, July, 2024-a prime minister paih thlak, Sheikh Hasina-i’n India a pan atang khan ram pahnih inkar hi a lo khi sa bawk a ni.
“Himna dinhmun a chhiat hnuah khan kan inkhar lo thei ta lo a ni,” tiin Indian visa centre-a hotu pakhat chuan December thla khan ANI news agency a hrilh.
Bangladesh pawhin January khan Indian-te tan visa tihchhuah a titawp a, sumdawnna leh hna thil avanga visa pek ngai tih loh chu Kolkata, Mumbai leh Chennai-a an hmun atanga pek chhuah a khap vek a. New Delhi-a Bangladesh high commission pawhin December 22-a an mission bula lungawi lohna lantirna a awm hnuah tiam chin awm lovin visa pek chhuah a khap zui bawk.