Rahul-a’n thudik loin min bei – BJP

Rahul-a’n thudik loin min bei – BJP
Congress hruaitu Rahul Gandhi-a’n BJP leh Mizote chungchangah thu dik lo a sawi a, development politics niloin inthlan dawna an tih thin angin sakhaw politics an rawn khel leh tih BJP Mizoram thupuangtu Lalremsangi Fanai chuan a sawi.
BJP Mizoram thupuangtu chuan Aizawla Rahul Gandhi thusawiah India ram democracy ram ropui ber kan ni tih khawvel hriat a ni chungin, Mizo mipui chu kan sakhuana, kan culture, kan nunphung pawh chhe ta vek anga a sawi chu pawi an tih thu sawiin, “Mizo kan nih angin khatiang taka khawvel hriata min puh duh mai kha a zahthlak kan ti a, Mizo mipui min hmuhsitna lian tak a ni,” a ti.
India rama Congress a sawrkar laiin kan hnufual em em a, BJP sawrkar PM Modi kaihhruaina hnuaiah kalphung dik hmangin hma lak a ni a, Digital India khawvelah kan lut a, chu chuan eirukna tam tak kawng a khar a, nasa takin India-in hma a sawn phah tih a sawi a. Kum 1966-ah Mizoram a buai a, Congress sawrkar chuan ram dang ang maiin jet fighter hmangin min bomb a. Kha bomb avanga nunau tamtakin an tawrhna kha a rapthlak hle a, Mizoram mipuiin kan theihnghilh thei lo tiin a sawi. “Congress sawrkar hunlai bawkin Mizoram ramri awlsam taka chinfel theih a nih laia chingfel loa, vawiin thlenga ramri buai kan nei hi Congress party vang a ni,” a ti.
Sakhuana chungchangah Congress chuan thudik tawk lo an chhakchhuak fo tih Lalremsangi Fanai hian a sawi. “Development policy puanchhuah tur nei siloin, sakhaw politics hmanga BJP beih hi an thupui ber a ni a, inthlan dawn apiangin an sawi thin,” a ti.
Tunhnaiah Israel leh Palestine inbeihnaah Congress party chuan Palestine (Hamas terrorist) te tan zawngin thu a chhuah leh tlat nia sawiin, BJP chu Israel tan a ding reng tih a sawi. “Heng atang ringawt pawh hian Congress hian politics an khelh chhan a chiang hle a, a ram milin dawt hmangin thu an sawi zel mai thin. Congress party hian development policy sawi tur an nei a nih chuan sawi ve mai se, tute emaw remchanga hmanga sakhuana politics hmang tawh lo turin kan ngen a ni,” BJP thupuangtu hian a ti.