MNF leh ZPM hi BJP/RSS tana kawng hawngtu an ni – Rahul Gandhi

BJP leh RSS in India ram chu an duhdan anga kaihhruai tumin sakhua, hnam nihphung leh history bakah ram danpui an sawinghing mek a. Mizoramah pawh an duh ang tihhlawhtlin a nih theih nan MNF leh ZPM chu an kawng hawngtu an ni ve ve tih Congress hruaitu Rahul Gandhi chuan a sawi.Aizawla thuthar thehdarhtute nen an inkawmnaah Rahul Gandhi chuan India chu states hrang hrang awmkhawmin a din, sakhaw tin, hnam tin ziarang leh nunphung, hnam tin tawng leh kan hnam history theuh vawnhim vek chu Congress party-in a lo kalpui reng tawh leh kalpui zel tum a nih laiin, BJP leh RSS chuan an duhdan angin sakhaw tin leh hnam tin an thuhnuaia dah vek an tum a; chu chuan India ramah buaina a chhawkchhuak a, tuna Manipur buaina pawh chu chu a bulthum a ni tih a sawi.
Mizoramah BJP chuan MNF leh ZPM chu an kawng hawngtu atan hman an tum ve ve tih sawiin, MNF phei chuan a thawhpui mek a; ZPM pawh an bang bik lo, tiin, “BJP leh RSS in ram an hruai duh dan hi langsar leh tih takzeta dotu awmchhun chu Congress party a ni,” a ti. India ram chu sakhaw tin leh hnam tin zalenna a nih leh theih nan Congress party a sawrkar a ngai tih a sawi.
Congress party a tlahniam tih chu thudik lo a ni tih Congress hruaitu hian a sawi. BJP chakna state nia sawi chu tunah an chhuhsak leh mek a, Mizoram telin hmarchhak state-ah pawh chu chu a thleng chho leh dawn tih a sawi a ni.
BJP-in mi hausa thenkhat thurualpuiin ram economy a sawpchhiat mek thu sawiin, hnathawh tur tam tak siamtu industry tenau ho an rahbeh mekna chu Congress party chuan phelhsak tumin nasa takin tan a khawh tih Rahul Gandhi hian a sawi bawk.