Rahul Gandhi-an BJP te tithinrim tak zet

Lok Sabha-a Leader of Opposition Rahul Gandhi-an President thusawi Motion of Thanks neiha thusawi a neih chuan boruak siam hatin Prime Minister Narendra Modi pawhin a sawisel hial a; Rahul Gandhi chuan Hindu te chu a hmusit a ti a. Rahul chuan BJP te chu ‘Hindus tia insawi te hian huatna thehdarhin chintawk nei lovin tharumthawhna an kalpui a ni’ tiin a sawi.
“He thil hi a serious hle a, Hindu community pum violent tia sawi hi a serious a ni” tiin Modi chuan Gandhi thusawi laiin a lo inrawlh a. Rahul Gandhi chuan chhang letin, “Narendra Modiji hi Hindu community pum a ni lo, BJP te hi Hindu community aiawh an ni lo, RSS te hi Hindu community pum aiawh an ni lo” a ti let thung.
Rahul Gandhi thusawi lai hian PM Modi chuan tum hnih lai tibuaiin a lo inrawlh a. Gandhi thusawi a chhanah ‘minister te chuan an hlauh vangin chibai an buk lo’ a ti bawk a.
Rahul Gandh thusawi lai hian Prime Minister mai bakah senior Ministers rual Home Minister Amit Shah, Defence Minister Rajnath Singh, Environment Minister Bhupender Yadav, Agriculture Minister Shivraj Singh Chouhan leh Parliamentary Affairs Minister Kiren Rijiju te an lo inrawlh bawk a. Minister te hian Opposition leader hian House kaihhruai sual a tum an ti a, Rahul thung chuan a thusawi chu thudik vek a ni a ti ve thung a.
Lord Shiva thlalak keng langin a thusawi bul tan nan BJP te Hindutva chu sawiselin Congress party symbol kutphah erawh sakhua tin Islam, Sikhism, Christianity, Buddhism leh Jainism te nen inmil vek tiin chumai bakah Guru Nanak leh Isua Krista thlalak a pholang bawk.
“Shivaji khan hlau suh a ti a, tharumthawhna hnawl chungchang a sawi a, mahse, Hindus tia inchhal te hian huatna, tharumthawhna leh thudik lo thehdarhin an hmanhlel a ni” tiin Gandhi chuan BJP MP rual te chu a sawikhum a. Treausry Bench lam an thinrim hle laiin Congress leader chuan ‘Hindu in ni lo’ a tihkhum bawk.
Opposition leader chuan Hindus te chu ‘violent community’ mi ti a ni tiin Home Minister Amit Shah chu lo inrawlhin, “Vaibelchhe tel te chuan Hindu an nih thu chhuang takin an sawi a, Rahul Gandhi hian ram pum huapin ngaihdam a dil tur a ni,” a ti bawk a.
Home Minister chuan Speaker Om Birla chu Opposition leader chu rules-in a phalsak chin bak hun pe lo tur leh Chair zahawmna humhim turin a ngen bawk a.
Rahul Gandhi leh Speaker Birla te pawh an inhnial buai bawk a. Rahul Gandhi chuan, “Speaker i niha kan lawmpui che khan thil hmuh ka nei a. Ka chibai lai che khan min chibai ve mai a. Modi-an a chibai che kha chuan a hmaah kun hniamin i chibai a ni” tiin a sawi.
Speaker Birla chuan chhang let in, “Prime Minister chu Leader of house a ni a. Kan culture leh tradition chuan upa zawk te hmaa kun hniam turin min tia, kan inantlanpui te chu inangtlang taka hmachhawn turin min ti” a ti thung.
Rahul Gandhi chuan Lord Shiva chungchang a sawi laiin a microphone chu tihtawpsak a ni a, Lok Sabha camera te pawhin hmun dang an la a ti a. “Lord Shiva thlalak House chhunga ken luh phal loh em ni?” tiin a zawt bawk a.
Congress leader chuan BJP te chu Constitution leh fundamental concept of India te chu ‘systematic taka bei’ ah a puh bawk a. Minority te vauin, huatna leh tharumthawhna Muslims, Sikhs leh Christians te lakah kalpuiah a puh bawk a. “PM Modi leh sorkar thupekin beih ka tawk a. Case 20 chuang ka nei a, kum hnih lung in tang tura tih ka ni bawk a, ka in min laksak a, Enforcement Directorate ten darkar 55 thu min zawtfiah bawk” tiin Rahul Gandhi chuan a sawi bawk.
Sorkar pawh natak beiin Congress leader chuan Agniveer scheme hi Modi hmalakna dik tak ‘labourer te compensation mumal pawh pek lova hmanna’ a tihsak bawk a. Manipur-ah civil war sorkar ina chawk chhuak ti bawkin National Eligibility-cum-Entrance Test (NEET) chu professional te tana commercial exam tihsak bawkin, engvangin nge sorkarin minimum support price (MSP) chu legal guarantee a pek loh tia zawhna siamin sorkar chu thil man sang leh hna vangah a sawisel bawk.