Rahul Gandhi an PM Modi chhang let saks

BJP tena Congress manifesto dah hniam tuma ‘Muslim League’ sulhnu an tihsak chu chhangin Rahul Gandhi chuan ram thendarh duha inthurualte chu history in a hriatpui vek zawk a, political platform atanga ‘dawt sawi’ in history a thlak danglam ngai lo a ti.
Gandhi chuan kum 2024 Lok Sabha poll chu ideology pahnih inbeihna a ni a ti a. Congress chuan united India a duh reng a, lehlamah mipui te thendarh duh leh tum tlat an awm thung a ti.
“Tun inthlan hi ideology pahnih inbeihna a ni a. Lehlamah Congress te united India duh reng te leh lehlamah mipui te thendarh tum tlat te an ni” tiin Congress chief hlui chuan a sawi.
“He ram thendarh duh leh tuma tangho te leh he ram tihchaka lungruala siam tuma independence tana beitute chu history in a hriatpui a ni” tiin Gandhi chuan a sawi a.
“Quit India Movement laiin tute nge British te lam tang? Indian jail te chu Congress leader dahkhawm nana hman a nih lai khan State ah India thendarh duhte nena sorkar siam kha tute nge?” tia sawiin Rahul Gandhi chuan political platform atanga dawt sawiin history a thlak danglam thei ngawt lo a ti bawk.
Tun hnaia thusawina a neihah Prime Miniser Narendra Modi chuan Congress manifesto chu ‘Muslim League nemkai’ a tihsak a. Congress te chuan Election Commission hnenah an thleng nghe nghe a. Congress party chief Mallikarjun Kharge chuan Modi thusawiah ‘RSS rimchhia a tel’ a ti bawk.
Congress te chuan Prime Minister chuan ‘Hindu-Muslim inbeihna’ anga chhuah a tum tiin chu chu an mangan vang niin Lok Sabha poll ah seat 180 pawh lakphak an inrin loh vang an ti bawk.
Congress te chuan BJP te chu beilet bawkin Jan Sangha founder Syama Prasad Mookerjee, Hindu Mahasabha president chu kum 1940 chhova Muslim League te nena Bengal a sorkar siam ho an ni an ti ve sak bawk.